2014 ജനുവരി പതിനേഴിനാണ് ഡല്ഹിയിലെ ആഡംബര ഹോട്ടലില് സുനന്ദ പുഷ്കറിനെ മരിച്ച നിലയില് കണ്ടെത്തിയത്
ന്യൂഡല്ഹി : സുനന്ദ പുഷ്കറിന്റെ മരണവുമായി ബന്ധപ്പെട്ട കേസില് ശശി തരൂര് എം പിക്ക് മേല് കുറ്റം ചുമത്തണമെന്ന ആവശ്യത്തില് ഡല്ഹിയിലെ പ്രത്യേക കോടതി ഈ മാസം 29ന് വിധി പറയും. കേസ് 29ലേക്ക് മാറ്റി കോടതി ഉത്തരവിട്ടു. ആത്മഹത്യ പ്രേരണയ്ക്കോ കൊലപാതകത്തി നോ കുറ്റം ചുമത്തണമെന്ന് പ്രോസിക്യൂഷന് ആവശ്യപ്പെട്ടു. എന്നാല്, കുറ്റപത്രം നല്കാന് തക്ക തെളിവുകള് ശശി തരൂരിനെതിരെ ഇല്ലെന്ന് അഭിഭാഷകന് വാദിച്ചു.
സുനന്ദയുടെ മരണം ആത്മഹത്യയായിട്ടോ, നരഹത്യയായിട്ടോ കാണാനാകില്ല. അപകട മരണമായിട്ടാണ് കണക്കാക്കേണ്ടതെന്ന് ശശി തരൂരിന് വേണ്ടി ഹാജരായ മുതിര്ന്ന അഭിഭാഷകന് വികാസ് പഹ്വ കോടതിയെ അറിയിച്ചു.
2014 ജനുവരി പതിനേഴിനാണ് ഡല്ഹിയിലെ ആഡംബര ഹോട്ടലില് സുനന്ദ പുഷ്കറിനെ മരിച്ച നിലയില് കണ്ടെത്തിയത്. തരൂരിനെതിരെ ആത്മഹത്യ പ്രേരണാക്കുറ്റം അടക്കമാണ് കുറ്റപത്രത്തില് ചുമത്തിയത്.ഗാര്ഹിക പീഡനം, ആത്മഹത്യ പ്രേരണ തുടങ്ങിയ വകുപ്പുകള് ചുമത്തിയാണ് പാട്യാല കോടതിയില് കുറ്റപ്പത്രം സമര്പ്പിച്ചിരിക്കുന്നത്. പത്ത് വര്ഷം വരെ തടവു ശിക്ഷ ലഭിക്കാവുന്ന കുറ്റങ്ങളാണ് ചുമത്തിയിരുന്നത്. എന്നാല് സുനന്ദയുടെ ശരീരത്തില് കണ്ടെത്തിയിരുന്ന മുറിവുകള് തനിയെ എല്പ്പിച്ചതായിരിക്കാമെന്ന വിലയിരുത്തലുകളിലാണ് ഡെല്ഹി പൊലീസ് എത്തിയിരുന്നത്. ഇതിന്റെ അടിസ്ഥാനത്തിലാണ് ആത്മഹത്യ പ്രേരണ കുറ്റം ചുമത്തിയത്.
