ദോഹ : ലൈസൻസില്ലാതെ വൈദ്യുത ജോലികൾ ചെയ്യുന്നതിന്റെ അപകടസാധ്യതകളെക്കുറിച്ച് ജനങ്ങളിൽ അവബോധം വളർത്തുക എന്ന ലക്ഷ്യവുമായി ഖത്തർ ജനറൽ ഇലക്ട്രിസിറ്റി ആൻഡ് വാട്ടർ കോർപ്പറേഷൻ (കഹ്റമ) ക്യംപെയ്ന് തുടക്കം കുറിച്ചു. ജനറൽ ഡയറക്ടറേറ്റ് ഓഫ് സിവിൽ ഡിഫൻസുമായി സഹകരിച്ച്, വീടുകളിലും മറ്റിടങ്ങളിലും വൈദ്യുത സുരക്ഷ വർധിപ്പിക്കുകയാണ് ക്യാംപെയ്നിലൂടെ ലക്ഷ്യം വയ്ക്കുന്നത്.
വൈദ്യുത ജോലികൾ ചെയ്യുന്നതിന് സ്പെഷലൈസ്ഡ്, ലൈസൻസുള്ള ടെക്നീഷ്യന്മാരെ വിളിക്കേണ്ടതിന്റെ പ്രാധാന്യമാണ് ക്യാംപെയിൻ ഊന്നിപ്പറയുന്നത്. രാജ്യത്ത് ഇലക്ട്രിക്കൽ ജോലി ചെയ്യുന്നവർക്കായി കഹ്റമ ലൈസൻസ് നൽകുന്നുണ്ട്. ഇത് പരിഗണിക്കാതെ ലൈസൻസില്ലാത്തവരെയും ഇലട്രിക്കൽ ജോലിക്കായി വിളിക്കുന്നുണ്ട്. ഇത് നിയമവിരുദ്ധമാണ്.
ഈ മേഖലകളിലെ എല്ലാ തൊഴിലാളികൾക്കും അംഗീകൃത മാനദണ്ഡങ്ങളും ചട്ടങ്ങളും പാലിക്കുന്ന പ്രായോഗിക പരിചയവും സാങ്കേതിക വൈദഗ്ധ്യവും ഉണ്ടെന്ന് ഉറപ്പാക്കാനാണ് ഈ ലൈസൻസുകൾ ലക്ഷ്യമിടുന്നതെന്ന് കഹ്റമ അധികൃതർ പറഞ്ഞു. ലൈസൻസിനായി അപേക്ഷിക്കാൻ താൽപ്പര്യമുള്ള എല്ലാവർക്കും കഹ്റാമയുടെ വെബ്സൈറ്റ് വഴി അപേക്ഷകൾ സമർപ്പിക്കാം.
അതിനാവശ്യമായ യോഗ്യതകളും മറ്റും കഹ്റാമ വെബ്സൈറ്റിൽ വിശദമായി പ്രതിപാദിച്ചിട്ടുണ്ട്. സർട്ടിഫിക്കറ്റുകൾക്ക് പുറമെ കഹ്റമ നടത്തുന്ന പ്രായോഗിക, സൈദ്ധാന്തിക പരീക്ഷകളിൽ വിജയിക്കുകയും വേണം. ലൈസൻസ് ഒരു വർഷത്തേക്ക് സാധുതയുള്ളതും പുതുക്കാവുന്നതുമാണ്. 2022 ലെ രണ്ടാം നമ്പർ നിയമപ്രകാരമാണ് എപ്പോൾ ലൈസൻസ് എപ്പോൾ ലൈസൻസ് അനുവദിക്കുന്നതെന്നും കഹ്റമ അധികതൃതർ വ്യക്തമാക്കി.
