ദുബായ് : ബംഗ്ലാദേശിന്റെ നിലവിലെ സാമൂഹിക സ്ഥിതിവിശേഷങ്ങൾ പങ്കുവച്ച് താൽക്കാലിക സർക്കാരിന്റെ മുഖ്യ ഉപദേഷ്ടാവായ പ്രഫ. മുഹമ്മദ് യൂനുസ്. രാജ്യത്തിന്റെ പ്രക്ഷുബ്ധമായ രാഷ്ട്രീയ സാഹചര്യത്തെക്കുറിച്ചും സ്ഥിരത പുനഃസ്ഥാപിക്കുന്നതിൽ മുന്നോട്ടുള്ള സുപ്രധാന പ്രവർത്തനങ്ങളെക്കുറിച്ചും ദുബായിൽ നടന്ന ലോക സർക്കാർ ഉച്ചകോടിയിൽ പ്രമുഖ മാധ്യമപ്രവർത്തകൻ ബെക്കി ആൻഡേഴ്‌സണുമായി സംവദിക്കുമ്പോഴാണ് സമാധാനത്തിനുള്ള നൊബേൽ സമ്മാന ജേതാവായ യൂനുസ് താൻ ഇപ്പോൾ വഹിക്കുന്ന ഭാരിച്ച ഉത്തരവാദിത്തത്തെക്കുറിച്ച് ചർച്ച ചെയ്തത്.
രാജ്യത്തിന്റെ അടിയന്തര ആവശ്യങ്ങൾ കാരണം താൻ ഒരിക്കലും ആഗ്രഹിച്ചിട്ടില്ലാത്ത ഉത്തരവാദിത്തം ഏറ്റെടുക്കേണ്ടി വന്നതായും അദ്ദേഹം പറഞ്ഞു. എങ്കിലും ഖേദമില്ല, പക്ഷേ അത് ഒരു വലിയ കടമയാണ്.പാരിസ് ഒളിംപിക് ഗെയിംസിനെ ഒരു സാമൂഹിക ബിസിനസായി രൂപകൽപന ചെയ്യുന്നതിലെ പ്രവർത്തനങ്ങൾ ഉൾപ്പെടെ, ആഗോളതലത്തിൽ സാമൂഹിക ബിസിനസും മൈക്രോ ക്രെഡിറ്റും മുന്നോട്ട് കൊണ്ടുപോകുന്നതിൽ ശ്രദ്ധ കേന്ദ്രീകരിച്ചിരിക്കെ, ഒരു അടിയന്തരാവസ്ഥ ഉണ്ടായപ്പോൾ അദ്ദേഹം ബംഗ്ലാദേശിലേക്ക് മടങ്ങി. രാജ്യത്തെ യുവാക്കൾ അദ്ദേഹത്തിന്റെ നേതൃത്വം ആവശ്യപ്പെട്ടിരുന്നു.
2025 അവസാനത്തിലോ 2026 ന്റെ തുടക്കത്തിലോ നടക്കാനിരിക്കുന്ന സ്വതന്ത്രവും നീതിയുക്തവുമായ തിരഞ്ഞെടുപ്പുകൾക്ക് രാജ്യം തയ്യാറെടുക്കുന്നുണ്ടെന്ന് ഉറപ്പാക്കുകയും നിയമവും ക്രമസമാധാനവും നിലനിർത്തുകയും ചെയ്യുക എന്നതായിരുന്നു താൽക്കാലിക സർക്കാരിന്റെ അടിയന്തര മുൻഗണനയെന്ന് അദ്ദേഹം വിശദീകരിച്ചു.
സാമ്പത്തിക, രാഷ്ട്രീയ കടമകൾക്കപ്പുറം ദേശീയ അനുരഞ്ജനത്തിന്റെയും നീതിയുടെയും ആവശ്യകത പ്രധാനപ്പെട്ടതാണ്. ബംഗ്ലാദേശിന്റെ ഭാവിയെക്കുറിച്ചുള്ള വിശാലമായ കാഴ്ചപ്പാടിലേയ്ക്ക് തിരിയുമ്പോൾ, ലാഭം പരമാവധിയാക്കുന്നതിനുപകരം മനുഷ്യന്റെ ആവശ്യങ്ങൾ നിറവേറ്റുന്നതിൽ ശ്രദ്ധ കേന്ദ്രീകരിച്ച ഒരു പുതിയ സാമ്പത്തിക മാതൃകയ്ക്ക് യൂനുസ് ആഹ്വാനം ചെയ്തു. സാമൂഹിക ബിസിനസിലൂടെ ദാരിദ്ര്യം, തൊഴിലില്ലായ്മ, പരിസ്ഥിതി തകർച്ച എന്നിവയില്ലാത്ത ലോകം കെട്ടിപ്പടുക്കാനുള്ള സാധ്യതയിലുള്ള തന്റെ വിശ്വാസം അദ്ദേഹം ആവർത്തിച്ചു.
നമ്മൾ അത് ആഗ്രഹിച്ചതുകൊണ്ടാണ് അത് സാധ്യമാകുന്നതെന്ന് എനിക്ക് പൂർണമായും ബോധ്യമുണ്ട്. ലാഭം ഉണ്ടാക്കുക എന്ന ഏക ലക്ഷ്യമില്ലാതെ ആരോഗ്യ സംരക്ഷണം, വിദ്യാഭ്യാസം, സാങ്കേതികവിദ്യ തുടങ്ങിയ സാമൂഹിക പ്രശ്നങ്ങൾ ബിസിനസുകൾ അഭിസംബോധന ചെയ്യണംയ ബംഗ്ലാദേശിന്റെ നിർണായക പരിവർത്തനത്തിന് യൂനുസ് മേൽനോട്ടം വഹിക്കുന്നത് തുടരുമ്പോൾ, തന്റെ ഉദ്ദേശ്യങ്ങളെക്കുറിച്ച് അദ്ദേഹം വ്യക്തമാക്കി.
തിരഞ്ഞെടുപ്പ് നടക്കുകയും തിരഞ്ഞെടുക്കപ്പെട്ട ഒരു സർക്കാർ അധികാരത്തിൽ വരികയും ചെയ്തുകഴിഞ്ഞാൽ താൻ സ്ഥാനമൊഴിയുമെന്നും തന്റെ ജോലി പൂർത്തിയാകുമ്പോൾ തിരഞ്ഞെടുക്കപ്പെട്ട സർക്കാരിന് ഉത്തരവാദിത്തം കൈമാറുകയും എനിക്ക് ഏറ്റവും ഇഷ്ടപ്പെട്ട കാര്യത്തിലേക്ക് മടങ്ങുകയും ചെയ്യും. സ്ഥാപനങ്ങൾ പുനർനിർമിക്കുന്നതിലും, ജനാധിപത്യം പുനഃസ്ഥാപിക്കുന്നതിലും, സാമ്പത്തിക പ്രതിസന്ധിയെ നേരിടുന്നതിലും ശ്രദ്ധ കേന്ദ്രീകരിച്ച്, ബംഗ്ലാദേശിനെ ഒരു പുതിയ അധ്യായത്തിലേക്ക് നയിക്കുമ്പോൾ യൂനുസ് നേരിടുന്ന വെല്ലുവിളികളെക്കുറിച്ചും സംസാരിച്ചു.
