കുവൈത്ത് സിറ്റി: പരിസ്ഥിതി സംരക്ഷണ ശ്രമങ്ങളുടെ ഭാഗമായി കുവൈത്തിൽ പൊതുഇടങ്ങളിലെയും നിയന്ത്രിത പ്രദേശങ്ങളിലെയും പുകവലി നിയന്ത്രണം കർശനമാക്കുന്നു. അതിനനുസരിച്ച് നിയമലംഘകർക്കെതിരെ 1,000 ദിനാർ വരെ പിഴ ചുമത്തുമെന്ന് പരിസ്ഥിതി സംരക്ഷണ വിഭാഗം ഡയറക്ടർ ബ്രിഗേഡിയർ ജനറൽ മിഷാൽ അൽ-ഫറാജ് അറിയിച്ചു.
നിരോധിത സമയങ്ങളിൽ മത്സ്യബന്ധനം നടത്തുന്നവർക്കും കർശന നടപടി സ്വീകരിക്കുമെന്നും ഇത്തരത്തിലുള്ളവരിൽ നിന്ന് പരിസ്ഥിതിയെ സംരക്ഷിക്കാൻ വകുപ്പിന്റെ നടപടികൾ ഊർജിതമാക്കിയിട്ടുണ്ടെന്നും അദ്ദേഹം പറഞ്ഞു. ഇതിന് പരിസ്ഥിതി പോലീസ്, കോസ്റ്റ് ഗാർഡ് ഡയറക്ടറേറ്റ് എന്നിവയുമായി ചേർന്ന് സംയുക്ത പരിശോധനകൾ നടത്തുന്നുണ്ട്. നിയമലംഘകരെ ബന്ധപ്പെട്ട അധികാരികൾക്ക് കൈമാറുന്നതിലും വിവരം കൈമാറ്റത്തിലുമാണ് കൂടുതൽ ശ്രദ്ധ നൽകിയിരിക്കുന്നതെന്നും അൽ-ഫറാജ് പറഞ്ഞു.
പൊതു ഇടങ്ങളിൽ, പ്രത്യേകിച്ച് പകുതി അടച്ചിട്ട സ്ഥലങ്ങളിലും മാളുകളിലുമുള്ള പുകവലിക്കാരെ പിഴവരികളിലൂടെ നിയന്ത്രിക്കാനാണ് പുതിയ നടപടികൾ. അടച്ചിട്ട വാണിജ്യസ്ഥാപനങ്ങളിൽ പുകവലിക്കാനാണ് 500 ദിനാർ വരെ പിഴ ചുമത്തുക. പാർക്കിങ് സ്ഥലങ്ങൾ, വിമാനത്താവളങ്ങൾ എന്നിവിടങ്ങളിലും സമാനമായ പിഴ ചുമത്തും. സ്ഥാപനങ്ങൾ പുകവലി അനുവദിക്കുകയാണെങ്കിൽ, അവയ്ക്ക് 1,000 ദിനാർ വരെ പിഴ ലഭിക്കാം.
കൂടാതെ, നിയമാനുസൃതമായി സിഗരറ്റ് ഉപേക്ഷിക്കാതെ നീക്കിവെക്കുന്നതിനും പൊതുവിടങ്ങളിൽ മാലിന്യം തള്ളുന്നതിനും 500 ദിനാർ വരെ പിഴ ലഭിക്കുമെന്നും അധികൃതർ മുന്നറിയിപ്പ് നൽകിയിട്ടുണ്ട്.
ഇത്തരം കർശന നടപടികൾ കുവൈത്തിലെ പരിസ്ഥിതി സംരക്ഷണ ശ്രമങ്ങളുടെ ഭാഗമായുള്ളതാണെന്നും, സമൂഹത്തിന്റെ ആരോഗ്യവും സുസ്ഥിരതയും ലക്ഷ്യമാക്കിയുള്ളതാണെന്നും അധികൃതർ വ്യക്തമാക്കുന്നു.
