കൊച്ചി: മുൻഗണനാ ഓഹരി വിൽപ്പനയിലൂടെ ഇസാഫ് സ്മോൾ ഫിനാൻസ് ബാങ്ക് 162 കോടി രൂപ സമാഹരിച്ചു. നിലവിലുള്ള നിക്ഷേപകരുൾപ്പെടെ യോഗ്യരായ (എച്.എൻ.ഐ) നിക്ഷേപകർക്കു വേണ്ടി ആകെ 2.18 കോടി രൂപയുടെ ഓഹരികളാണ് മുൻഗണനാ വിഭാഗത്തിൽ നീക്കിവച്ചിരുന്നത്. 75 രൂപയായിരുന്നു പ്രതിഓഹരി വില. 2020 സെ്ര്രപംബർ 30ലെ ബുക്ക് വാല്യൂ അനുസരിച്ച് പ്രീ ഇഷ്യു ഓഹരി വില 2.64 മടങ്ങും പോസ്റ്റ് ഇഷ്യു 2.45 മടങ്ങുമായിരുന്നു.
‘സമാഹരിച്ച അധിക മൂലധനം ബാങ്കിന്റെ മൂലധന പര്യാപ്തത 250 ബേസിസ് പോയിന്റുകൾ ഉയർത്തി കൂടുതൽ ശക്തിപ്പെടുത്തുകയും 2022 സാമ്പത്തിക വർഷത്തിൽ ലക്ഷ്യമിട്ട വളർച്ചയ്ക്ക് പിന്തുണ നൽകുകയും ചെയ്യും. കഴിഞ്ഞ വർഷം നടത്താൻ നിശ്ചയിച്ചിരുന്ന പ്രഥമ ഓഹരി വിൽപ്പന (ഐ.പി.ഒ) ഇപ്പോഴത്തെ ആശ്വാസകരമായ മൂലധന നിലയും വിപണി സാഹചര്യവും കണക്കിലെടുത്ത് മാറ്റിവയ്ക്കാനും തീരുമാനിച്ചു’ ഇസാഫ് ബാങ്ക് എം.ഡിയും സി.ഇ.ഒയുമായ കെ. പോൾ തോമസ് പറഞ്ഞു. ദുഷ്ക്കരമായ സമയത്തും നിക്ഷേപകർ കാണിക്കുന്ന അനുകൂല പ്രതികരണം വലിയ ലക്ഷ്യങ്ങൾ നേടാൻ കരുത്തേകുമെന്നും അദ്ദേഹം പറഞ്ഞു.
വെല്ലുവിളികൾ നിറഞ്ഞ ഈ സമയത്തും ബാങ്ക് മികച്ച വളർച്ച കൈവരിച്ചു. 202021 സാമ്പത്തിക വർഷം മൊത്ത ബിസിനസിൽ 25.86 ശതമാനം വളർച്ച രേഖപ്പെടുത്തി. 2021 മാർച്ച് 31 വരെയുള്ള കണക്കുകൾ പ്രകാരം മൊത്തം നിക്ഷേപം 28.04 ശതമാനം വർധിച്ച് 9000 കോടി രൂപയിലെത്തി. വായ്പകൾ 23.61 ശതമാനം വർധിച്ച് 8417 കോടി രൂപയിലുമെത്തി. ഇക്കാലയളവിൽ ബാങ്കിന്റെ ആകെ ബിസിനസ് 17,412 കോടി രൂപയും കടന്നു. മുൻ വർഷം ഇത് 13,835 കോടി ആയിരുന്നു. കറന്റ് അക്കൗണ്ട് സേവിങ്സ് അക്കൗണ്ട് 82 ശതമാനമെന്ന വളരെ മികച്ച വളർച്ച രേഖപ്പെടുത്തി. കഴിഞ്ഞ സാമ്പത്തിക വർഷം ബാങ്ക് 96 പുതിയ ഔട്ട്ലെറ്റുകൾ തുറന്നതോടെ ആകെ ശാഖകളുടെ എണ്ണം 550 ആയി. നിലവിൽ, 19 സംസ്ഥാനങ്ങളിലും രണ്ട് കേന്ദ്രഭരണ പ്രദേശങ്ങളിലും ഇസാഫ് സ്മോൾ ഫിനാൻസ് ബാങ്കിന് സാന്നിധ്യമുണ്ട്.
