ഹവല്ലിയിൽ കർശന പരിശോധന; 797 നിയമലംഘനങ്ങൾ കണ്ടെത്തി
കുവൈത്ത് സിറ്റി: ഹവല്ലി പ്രദേശത്ത് ഇന്നലെ കർശനമായ പരിശോധന നടത്തി ആഭ്യന്തര മന്ത്രാലയത്തിലെ ട്രാഫിക്ക് ആൻഡ് ഓപ്പറേഷൻസ് വിഭാഗം. മന്ത്രാലയ അണ്ടർ സെക്രട്ടറി മേജർ ജനറൽ ജമാൽ അൽ സയേഗിന്റെ നിർദേശപ്രകാരമായിരുന്നു പരിശോധന ക്യാമ്പയിൻ.
ട്രാഫിക്ക് വിഭാഗം അസിസ്റ്റന്റ് ഡയറക്ടർ ജനറൽ ബ്രിഗേഡിയർ ഖാലിദ് മഹ്മൂദ് അടക്കം ഉന്നത ഉദ്യോഗസ്ഥരാണ് പരിശോധനയ്ക്ക് നേതൃത്വം നൽകിയത്. മേഖലയിൽ നടന്ന പരിശോധനയിൽ ആകെ 797 നിയമലംഘനങ്ങളാണ് കണ്ടെത്തിയതെന്ന് അധികൃതർ പറഞ്ഞു.
13 വാഹനങ്ങളാണ് പിടിച്ചെടുത്തത്.
ഡ്രൈവിംഗ് ലൈസൻസ് ഇല്ലാതെ വാഹനമോടിച്ച പ്രായപൂർത്തിയാകാത്ത മൂന്ന് പേരെ അറസ്റ്റ് ചെയ്യുകയും ജുവനൈൽ പൊലീസ് വിഭാഗത്തിലേക്ക് മാറ്റുകയും ചെയ്തു. റെസിഡൻസി, തൊഴിൽ നിയമലംഘകരായ ഏഴ് പേരാണ് പിടിയിലായിട്ടുള്ളത്. ആയുധവും സംശയാസ്പദമായ മയക്കുമരുന്നും കൈവശം വച്ചതിന് അസാധാരണമായ അവസ്ഥയിൽ രണ്ട് പേരെ അറസ്റ്റ് ചെയ്തിട്ടുണ്ട്.
ഒട്ടേറെ നിയമലംഘനങ്ങൾ അവസാനിപ്പിക്കാൻ പരിശോധന ക്യാമ്പയിനുകൾ കൊണ്ട് സാധിക്കുന്നുണ്ടെന്ന് അധികൃതർ പറഞ്ഞു.
