കാര്വാര്: ഷിരൂരില് മണ്ണിടിച്ചിലില് മരണപ്പെട്ട അര്ജുന്റെ മൃതദേഹം ബന്ധുക്കള്ക്ക് കൈമാറി. ഡിഎന്എ പരിശോധനയ്ക്ക് ശേഷം മൃതദേഹം അര്ജുന്റേതാണെന്ന് തിരിച്ചറിഞ്ഞതോടെയാണ് മൃതദേഹം കൈമാറിയത്. മൃതദേഹവുമായി അര്ജുന്റെ സഹോദരന് അടക്കമുള്ള സംഘം കോഴിക്കോട്ടേയ്ക്ക് പുറപ്പെട്ടു.
സതീഷ് സെയില് എംഎല്എ, കാര്വാര് എസ്പി നാരായണ ഉള്പ്പെടെയുള്ളവരും മൃതദേഹത്തെ അനുഗമിക്കുന്നുണ്ട്. അപകടം നടന്ന സ്ഥലത്ത് ആംബുലന്സ് അഞ്ച് മിനിറ്റ് നിര്ത്തിയിടും. അര്ജുന്റെ മൃതദേഹം നാട്ടിലെത്തിക്കുന്നതിനുള്ള ചെലവ് പൂര്ണമായും വഹിക്കുന്നത് കര്ണാടക സര്ക്കാരാണ്. ഇതിന് പുറമേ കര്ണാടക സര്ക്കാരിന്റെ ധനസഹായമായ അഞ്ച് ലക്ഷം രൂപയും അര്ജുന്റെ കുടുംബത്തിന് കൈമാറും. നാളെ രാവിലെയോടെ അര്ജുന്റെ മൃതദേഹം കോഴിക്കോട്ടെ കണ്ണാടിക്കലിലെ വീട്ടില് എത്തിക്കും. എട്ട് മണി മുതല് പൊതുദര്ശനത്തിന് വെയ്ക്കും. പതിനൊന്ന് മണിയോടെ വീട്ടുവളപ്പില് സംസ്കാര ചടങ്ങുകള് നടക്കും.
അര്ജുന്റെ മൃതദേഹം നാട്ടിലെത്തിക്കുന്നതിനുള്ള ചെലവ് പൂര്ണമായും വഹിക്കുന്നത് കര്ണാടക സര്ക്കാരാണ്. ഇതിന് പുറമേ കര്ണാടക സര്ക്കാരിന്റെ ധനസഹായമായ അഞ്ച് ലക്ഷം രൂപയും അര്ജുന്റെ കുടുംബത്തിന് കൈമാറും. കഴിഞ്ഞ ദിവസമാണ് ഗംഗാവലിപ്പുഴയില് നടത്തിയ തിരച്ചിലില് അര്ജുന്റെ ലോറിയുടെ കാബിന് ലഭിച്ചത്. ലോറിയില് നിന്ന് അഴുകിയ നിലയില് മൃതദേഹ ഭാഗങ്ങള് കണ്ടെത്തി. ലോറി അര്ജുന്റേത് തന്നെയെന്ന് ഉടമ മനാഫ് സ്ഥിരീകരിച്ചു. കണ്ടെത്തിയത് അര്ജുന്റെ മൃതദേഹഭാഗങ്ങളാണെന്ന് സ്ഥിരീകരിക്കാന് ഡിഎന്എ പരിശോധനയ്ക്ക് വിധേയമാക്കുകയായിരുന്നു. ലോറിയുടെ കാബിനില് നടത്തിയ പരിശോധനയില് അര്ജുന്റെ രണ്ട് ഫോണുകളും കുട്ടിക്ക് വാങ്ങിയ കളിപ്പാട്ടവും വാച്ച്, പ്രഷര് കുക്കര്, സ്റ്റീല് പാത്രങ്ങള്, അര്ജുന്റെ വസ്ത്രങ്ങള് അടക്കം കണ്ടെടുത്തിരുന്നു.
അര്ജുനെ കാണാതായി എഴുപത്തിരണ്ടാമത്തെ ദിവസമാണ് ലോറിയുടെ ഭാഗങ്ങളും മൃതദേഹ ഭാഗങ്ങളും കണ്ടെത്തിയത്. കാലാവസ്ഥ പ്രതികൂലമായതിനാല് ഏറെ നാള് തിരച്ചില് നിര്ത്തിവച്ചിരുന്നു. കഴിഞ്ഞ ദിവസം ഡ്രഡ്ജര് എത്തിച്ച് നടത്തിയ തിരച്ചിലാണ് ഫലം കണ്ടത്.
