കൊച്ചി: ഗുണ്ടാത്തലവന് ഓം പ്രകാശ് പ്രതിയായ ലഹരി കേസില് സിനിമാ താരങ്ങള്ക്കെതിരെ കൂടുതല് കണ്ടെത്തലുമായി പൊലീസ്. നടന് ശ്രീനാഥ് ഭാസിയും നടി പ്രയാഗമാര്ട്ടിനും എത്തിയത് ഓം പ്രകാശ് ഒരുക്കിയ പാര്ട്ടിയില് പങ്കെടുക്കാനെന്നാണ് പൊലീസ് നിഗമനം. ഓം പ്രകാശിന്റെ മുറിയില് തന്നെയാണ് പാര്ട്ടി സംഘടിപ്പിച്ചത്. ഇരുവരെയും എത്തിച്ച ബിനു ജോസഫില് നിന്നുമാണ് അന്വേഷണ സംഘത്തിന് നിര്ണായക വിവരം ലഭിച്ചത്.
ഉടന് താരങ്ങളുടെ മൊഴി എടുക്കും. എന്നാല് ഇരുവര്ക്കും ഓം പ്രകാശിനെ നേരിട്ട് പരിചയമില്ലെന്നാണ് കണ്ടെത്തല്. ബിനു ജോസഫ് വഴിയാണ് ഇവര് ഹോട്ടല് മുറിയില് എത്തിയത്. ആളുകളുടെ എണ്ണം കൂടിയതോടെയാണ് പൊലീസില് വിവരം അറിയിച്ചത്. കൊച്ചിയില് ഇയാള് ബുക്ക് ചെയ്ത മുറിയില് ഇരുപതോളം പേര് എത്തിയിരുന്നതായും പൊലീസിന്റെ റിമാന്ഡ് റിപ്പോര്ട്ടില് വ്യക്തമാക്കുന്നു. ബോബി ചലപതി എന്നയാളുടെ പേരിലാണ് മുറി ബുക്ക് ചെയ്തത്. മുറിയിലെത്തിയ ആളുകളെ ചോദ്യം ചെയ്യണമെന്നും അന്വേഷണ സംഘം ആവശ്യമുന്നയിച്ചിട്ടുണ്ട്.
ഇവരെക്കൂടാതെ റിമാന്ഡ് റിപ്പോര്ട്ടില് പരാമര്ശമുള്ള മറ്റുള്ളവരുടെ മൊഴിയും എടുക്കും. കൂടുതല് വിവരങ്ങള് ശേഖരിച്ച ശേഷം ഓം പ്രകാശിനെയും അന്വേഷണ സംഘം വിശദമായി ചോദ്യം ചെയ്യും. ഇന്നലെ കസ്റ്റഡിയിലെടുത്ത എളമക്കര സ്വദേശിയെ രാത്രി വൈകി ചോദ്യം ചെയ്ത് വിട്ടയച്ചിരുന്നു. കേസില് കൂടുതല് അറസ്റ്റുകള്ക്ക് സാധ്യയുണ്ടെന്നാണ് പൊലീസ് നല്കുന്ന വിവരം. ഓം പ്രകാശിന്റെ മൊബൈല് ഫോണ് ഫോറന്സിക് പരിശോധനക്ക് വിധേയമാക്കും. ലഹരിക്കേസില് ഇന്നലെയാണ് ഓംപ്രകാശിനെ പൊലീസ് അറസ്റ്റ് ചെയ്തത്. ലഹരിപ്പാര്ട്ടി നടക്കുന്നുവെന്ന രഹസ്യവിവരത്തെ തുടര്ന്ന് കുണ്ടന്നൂരിലെ ഹോട്ടലില് നടത്തിയ തിരച്ചിലില് ഇയാള് പിടിയിലാകുകയായിരുന്നു.
