മസ്കത്ത്: ഒമാനിലെ ആഭ്യന്തര സാമ്പത്തിക ഇടപാടുകളിൽ ഇനി മുതൽ ഐബാൻ നമ്പർ (International Bank Account Number – IBAN) നിർബന്ധമായിരിക്കുമെന്ന് സെൻട്രൽ ബാങ്ക് ഓഫ് ഒമാൻ അറിയിച്ചു. ജൂലൈ 1, 2025 മുതൽ പ്രാബല്യത്തിൽ വന്ന പുതിയ നയം സുരക്ഷയും കാര്യക്ഷമതയും മുൻനിർത്തിയുള്ളതാണെന്ന് അധികൃതർ വ്യക്തമാക്കി.
സെൻട്രൽ ബാങ്ക് പ്രസ്താവനയിൽ വ്യക്തമാക്കിയത് പോലെ, ഐബാൻ സംവിധാനത്തിലൂടെ:
- പ്രാദേശിക പണമിടപാടുകളുടെ കാര്യക്ഷമത വർധിക്കും
- പ്രവർത്തന പിശകുകൾ കുറയും
- വ്യക്തികളും സ്ഥാപനങ്ങളും തമ്മിലുള്ള ഇടപാടുകൾ വേഗത്തിൽ പൂർത്തിയാകാം
ഐബാൻ നമ്പർ ഉപയോഗിക്കുമ്പോൾ പണമിടപാടുകൾ കൂടുതൽ സുരക്ഷിതവും സുഗമവുമാവുന്നതിനാൽ, ഉപഭോക്തൃ അനുഭവം വളരെയധികം മെച്ചപ്പെടുമെന്ന് അധികൃതർ വ്യക്തമാക്കി. ഇതിനൊപ്പം വ്യാപാര സ്ഥാപനങ്ങൾക്കും സ്ഥാപനങ്ങൾക്കുമിടയിലെ പണമിടപാടുകൾക്കും സുതാര്യതയും കൃത്യതയും ഉറപ്പാക്കപ്പെടും.
ആഗോള പണമിടപാടുകൾക്കായി സെൻട്രൽ ബാങ്ക് ഓഫ് ഒമാൻ 2024 മാർച്ച് 31 മുതൽ തന്നെ ഐബാൻ സംവിധാനം രാജ്യത്ത് നടപ്പിലാക്കിയിരുന്നു. ഇപ്പോൾ അത് ആഭ്യന്തര ഇടപാടുകൾക്കും വ്യാപിപ്പിക്കുന്നതിന്റെ ഭാഗമായി പുതിയ മാർഗ്ഗനിർദ്ദേശങ്ങളാണ് നിലവിൽ വന്നത്.
