കണ്ണൂർ : മുഖ്യമന്ത്രിക്കും മറ്റുമെതിരെ വ്യാജ തെളിവുകൾ സൃഷ്ടിക്കാൻ സമ്മർദവും ഭീഷണിയും നിയമവിരുദ്ധ പ്രവർത്തനങ്ങളും നടത്തിയ കസ്റ്റംസ്, ഇഡി ഉദ്യോഗസ്ഥർക്കെതിരെ അന്വേഷണം ആവശ്യപ്പെട്ട്‌ ഡിജിപിക്ക്‌ പരാതി. തലശേരി തിരുവങ്ങാട്ടെ എൻ വി ജിതേഷാണ്‌ പരാതി നൽകിയത്‌. ഇതുമായി ബന്ധപ്പെട്ട്‌ ഗൂഢാലോചന നടത്തിയ ബിജെപി നേതാക്കൾക്കെതിരെയും അന്വേഷണം ആവശ്യപ്പെട്ടു.
നയതന്ത്ര ബാഗേജിലൂടെ തിരുവനന്തപുരം വിമാനത്താവളം വഴി സ്വർണക്കടത്തു നടത്തിയതായി വാർത്ത വന്ന ദിവസംതന്നെ എൽഡിഎഫ്‌ സർക്കാരിനും മുഖ്യമന്ത്രിയുടെ ഓഫീസിനുമെതിരെ പുകമറ സൃഷ്ടിക്കാൻ ബിജെപി സംസ്ഥാന പ്രസിഡന്റ്‌ കെ സുരേന്ദ്രൻ ശ്രമിച്ചു. ആരോപണം കളവാണെന്ന്‌ പിന്നീട്‌ തെളിഞ്ഞു. നയതന്ത്ര ബാഗേജിലൂടെയല്ല സ്വർണം കടത്തിയതെന്ന്‌ കേന്ദ്രമന്ത്രി വി മുരളീധരൻ പറഞ്ഞതും തെറ്റാണെന്നു വ്യക്തമായി. ബിജെപി നിയന്ത്രണത്തിലുള്ള ജനം ടിവി മേധാവി അനിൽ നമ്പ്യാർ പ്രധാനപ്രതിയുമായി നടത്തിയ ഇടപെടലും പുറത്തുവന്നു.
സ്വർണക്കടത്തുകേസ്‌ സംസ്ഥാന സർക്കാരിനെതിരെ തിരിച്ചുവിടാനുള്ള ശ്രമം പൊളിഞ്ഞപ്പോഴാണ്‌ ബിജെപി നേതാക്കൾ ഗൂഢാലോചന നടത്തിത്‌. തുടർന്ന് മന്ത്രിമാർക്കും സിപിഐ എം നേതാക്കൾക്കുമെതിരെ ഇഡി, കസ്റ്റംസ് ഉദ്യോഗസ്ഥരുടെ വഴിവിട്ട നീക്കം ഉണ്ടായി. വ്യാജരേഖകൾ സൃഷ്ടിച്ചും മൊഴികൾ രേഖപ്പെടുത്തിയും സിപിഐ എം നേതാക്കളെയും സർക്കാർ സാരഥികളെയും കേസിൽപ്പെടുത്താൻ ബിജെപി നേതാക്കളും ഇഡി, കസ്റ്റംസ് ഉദ്യോഗസ്ഥരും ഗൂഢാലോചന നടത്തിയതിന്‌ തെളിവുകളുണ്ട്‌.
മുഖ്യപ്രതി സ്വപ്‌ന സുരേഷിന്റെ ശബ്ദരേഖ ബിജെപി നേതാക്കളും അന്വേഷണ ഉദ്യോഗസ്ഥരും തമ്മിലുള്ള അവിശുദ്ധ കൂട്ടുകെട്ട്‌ വെളിവാക്കുന്നു. ഇതുസംബന്ധിച്ച്‌ തെളിവുകളും ദൃക്‌സാക്ഷി മൊഴികളും പുറത്തുവന്നു.
ഇതിന്റെ അടിസ്ഥാനത്തിൽ മുഖ്യമന്ത്രി ക്കെതിരെ ഗൂഢാലോചന നടത്തിയ ഉദ്യോഗസ്ഥർക്ക് എതിരെ അന്വേഷണം വേണമെന്നാണ് പരാതി.
