യുഎഇയിൽ ഇന്ധനവില കുറഞ്ഞു; പുതിയ നിരക്ക് നാളെ മുതൽ പ്രാബല്യത്തിൽ

അബുദാബി : യുഎഇയിൽ അടുത്തമാസ(ഡിസംബര്‍)ത്തെ ഇന്ധനവില പ്രഖ്യാപിച്ചു. നവംബറിലേതിനേക്കാളും പെട്രോളിന് 13 ഫിൽസ് വരെ കുറഞ്ഞു. അതേസമയം ഡീസലിന് 1 ഫിൽസ് കൂടുകയും ചെയ്തു. നാളെ(1) മുതൽ പുതിയ നിരക്ക് പ്രാബല്യത്തിൽ വരും. 
പെട്രോൾ വില വിശദമായി
∙ സൂപ്പർ98 – ലിറ്ററിന് 2.61 ദിർഹം. (നവംബറിൽ ലിറ്ററിന് 2.74   ദിർഹം). വ്യത്യാസം 13 ഫിൽസ്. 
∙ സ്പെഷൽ 95 – ലിറ്ററിന്  2.50 ദിർഹം. (നവംബറിൽ 2.63   ദിര്‍ഹം). വ്യത്യാസം 13 ഫിൽസ്. 
∙ ഇ–പ്ലസ് 91- ലിറ്ററിന് 2.43 ദിർഹം(നവംബറിൽ 2.55  ദിർഹം). വ്യത്യാസം 12 ഫിൽസ്.‍ 
∙ ഡീസൽ – ലിറ്ററിന് 2.68 ദിർഹം. (നവംബറിൽ ലിറ്ററിന് 2.67 ദിർഹം). വ്യത്യാസം 1 ഫിൽസ്.
ഓടിക്കുന്ന വാഹനത്തിന്റെ തരം അനുസരിച്ച്, ഡിസംബറിൽ ഫുൾ ടാങ്ക് പെട്രോൾ ലഭിക്കുന്നത് കഴിഞ്ഞ മാസത്തേക്കാൾ 6.12 ദിർഹം മുതൽ 9.62 ദിർഹം വരെ കുറവായിരിക്കും. തുടർച്ചയായ രണ്ട് മാസം വില കുറഞ്ഞ ശേഷം നവംബറിൽ യുഎഇയിൽ ഇന്ധന വില കൂടിയിരുന്നു. 2015-ൽ യുഎഇ പെട്രോൾ വിലനിയന്ത്രണം നീക്കുകയും ആഗോള വിലയുമായി ബന്ധപ്പെടുത്തുകയും ചെയ്തതിനാൽ എല്ലാ മാസാവസാനവും നിരക്ക് പരിഷ്കരിക്കുന്നു.  ഊർജ മന്ത്രാലയം അംഗീകരിച്ച ഇന്ധന വിലയാണ് എല്ലാ മാസവും നിർണയിക്കുന്നത്.