40 വയസിനു മുകളിലുള്ള എല്ലാവര്ക്കും ജൂലായ് 15 നകം ആദ്യ ഡോസ് വാക്സിന് നല്കാന് മുഖ്യമന്ത്രി പിണറായി വിജയന് നിര്ദേശം നല്കി
തിരുവനന്തപുരം: 40 വയസിനു മുകളിലുള്ള എല്ലാവര്ക്കും ജൂലായ് 15 നകം ആദ്യ ഡോസ് വാക്സിന് നല്കാന് മുഖ്യമന്ത്രി പിണറായി വിജയന് നിര്ദേശം നല്കി. കോവിഡ് അവലോകന യോഗത്തി ല് സംസാരിക്കുകയായിരുന്നു മുഖ്യമന്ത്രി .45 വയസിന് മുകളിലുള്ള 50 ലക്ഷത്തോളം പേരാണ് ഇനി ആദ്യ ഡോസ് വാക്സിന് സ്വീകരിക്കാനുള്ളത്. ഈ മാസം സംസ്ഥാനത്തിന് 38 ലക്ഷം ഡോസ് വാക്സിന് ലഭിക്കും.
മൂന്നാം തരംഗത്തെ പ്രതിരോധിക്കാനുള്ള പ്രവര്ത്തനങ്ങള് യുദ്ധകാലാടിസ്ഥാനത്തില് എല്ലാ വകുപ്പുകളും കൈകോര്ത്ത് പൊതുജനങ്ങളുടെ പിന്തുണയോടെ നടപ്പാക്കാന് മുഖ്യമന്ത്രി നിര്ദേശിച്ചു. ഇതിനുള്ള തയ്യാറെടുപ്പിന്റെ ഭാഗമായി ബ്രേക്ക്ത്രൂ ഇന്ഫെക്ഷനുകളുടെയും കുട്ടികളിലെ ഇന്ഫെക്ഷനുകളുടെയും ജനിതക ശ്രേണീകരണം നടത്തും. ജനിതക ശ്രേണീ കരണത്തിന്റെ ഫലങ്ങള് ആഴ്ചതോറും ശാസ്ത്രീയമായി വിശകലനം ചെയ്യും. ലോകമെമ്പാടും കോവിഡ് വൈറസിന്റെ വ്യത്യസ്ത ജനിതക വ്യതിയാനങ്ങള് റിപ്പോര്ട്ട് ചെയ്യപ്പെടുന്നുണ്ട്. വകഭേദം വന്ന പുതിയ തരം വൈറസുകള് ഉണ്ടോയെന്ന് കണ്ടെത്തും.
സമൂഹ അടുക്കളയില് നിന്ന് ഭക്ഷണം ലഭിക്കുന്നില്ലെന്ന പരാതി ശ്രദ്ധയില്പ്പെട്ടാല് കര്ശന നടപടിയെടുക്കാന് തദ്ദേശ സ്വയംഭരണ വകുപ്പിനും ജില്ലാഭരണകൂടങ്ങള്ക്കും മുഖ്യമന്ത്രി നിര്ദ്ദേശം നല്കി. മാനസിക വൈകല്യമുള്ളവരെ വാക്സിനേഷന് മുന്ഗണനാ പട്ടികയില് ഉള്പ്പെടുത്തും. സെക്രട്ടട്ടേറിയറ്റില് മന്ത്രിമാരുടെ ഓഫീസ് ജീവനക്കാരുള്പ്പെടെ ഇനിയും വാക്സിനേഷന് ലഭിക്കാത്ത എല്ലാ ഉദ്യോഗസ്ഥരെയും വാക്സിനേഷന് മുന്ഗണനാ പട്ടികയില് ഉള്പ്പെടുത്തും.
