ദുബായ് ∙ ദുബായിലെ ഉന്നത വിദ്യാഭ്യാസ മേഖലയിലെ വിദേശ വിദ്യാർത്ഥികളിൽ ഇന്ത്യക്കാരാണ് ഏറ്റവും മുന്നിലുള്ളത്. 2024–25 അധ്യയന വർഷത്തിൽ വിദേശ വിദ്യാർത്ഥികളുടെ 43 ശതമാനവും ഇന്ത്യയിൽ നിന്നുള്ളവരാണെന്ന് നോളജ് ആൻഡ് ഹ്യൂമൻ ഡെവലപ്‌മെന്റ് അതോറിറ്റി (KHDA) പുറത്തിറക്കിയ കണക്കുകൾ വ്യക്തമാക്കുന്നു. ഇന്ത്യയ്ക്ക് പിന്നാലെ റഷ്യയും പാക്കിസ്ഥാനുമാണ് 6 ശതമാനവീതം വിദ്യാർത്ഥികൾ ഉള്ളത്. ചൈനയിൽ നിന്നും 4 ശതമാനം വിദ്യാർത്ഥികളും കസക്കിസ്ഥാനിൽ നിന്നും 3 ശതമാനവും പഠിക്കാനെത്തിയിട്ടുണ്ട്. ദുബായിലെ സ്വകാര്യ ഉന്നത വിദ്യാഭ്യാസ സ്ഥാപനങ്ങളിലെ ആകെ വിദ്യാർത്ഥികളിൽ 35.2 ശതമാനവും വിദേശികളാണ്.
നിലവിൽ ദുബായിൽ പ്രവർത്തിക്കുന്ന 41 സ്വകാര്യ ഉന്നത വിദ്യാഭ്യാസ സ്ഥാപനങ്ങളിൽ 42,026 വിദ്യാർത്ഥികളാണ് പഠിക്കുന്നത്. ഇതിൽ 37 എണ്ണം രാജ്യാന്തര യൂണിവേഴ്സിറ്റി ക്യാമ്പസുകളാണ്. പുതിയ അധ്യയന വർഷത്തിൽ മൊത്തം പ്രവേശനം 20.4 ശതമാനമായി ഉയർന്നതും, രാജ്യാന്തര വിദ്യാർത്ഥികളുടെ പ്രവേശന നിരക്ക് 25.3 ശതമാനത്തിൽ നിന്ന് 29.4 ശതമാനമായി വർധിച്ചതും ദുബായിയുടെ ആകർഷകത്വം ഉയരുന്നത് വ്യക്തമാക്കുന്നു.
വിദ്യാർത്ഥികൾക്കിടയിൽ ഏറ്റവും കൂടുതൽ തിരഞ്ഞെടുത്ത വിഷയങ്ങളായി ബിസിനസ് (54%), ഇൻഫർമേഷൻ ടെക്നോളജി, എൻജിനീയറിങ് (11% വീതം), മീഡിയ ആൻഡ് ഡിസൈൻ (6%), ഹ്യുമാനിറ്റീസ് (3%) എന്നിവയാണ്. ബിരുദ പഠനത്തിലാണ് 53% രാജ്യാന്തര വിദ്യാർത്ഥികളും 37% പേർ ബിരുദാനന്തര ബിരുദപഠനത്തിലുമാണ്.
അധ്യാപകശ്രേണിയിലും ഇന്ത്യക്കാർക്ക് തന്നെ ആധിപത്യമുണ്ട്. ദുബായിലെ 2,123 ഉന്നത വിദ്യാഭ്യാസ അധ്യാപകരിൽ 29% പേരും ഇന്ത്യൻ പൗരന്മാരാണ്. തുടർന്ന് യുകെ (13%), പാക്കിസ്ഥാൻ (6%), യുഎസ്, ലെബനൻ (5% വീതം) എന്നിവിടങ്ങളിൽ നിന്നുള്ളവരാണ്.
3,832 എമിറാത്തി വിദ്യാർത്ഥികളിൽ 62% പേർ ബിരുദ കോഴ്‌സുകളിലും 28% ബിരുദാനന്തര ബിരുദത്തിലും 8% പേർ ഡോക്ടറേറ്റ് കോഴ്‌സുകളിലുമാണ്. ബിസിനസ്, എൻജിനീയറിങ്, ഐടി, നിയമം, ഹ്യുമാനിറ്റീസ് എന്നീ വിഷയങ്ങളാണ് കൂടുതലായി തിരഞ്ഞെടുക്കുന്നത്.
