കിഫ്ബിയെ അപമാനിച്ചു കളയാം എന്നു കരുതുകയാണെങ്കില്‍ അപമാനിക്കപ്പെടുക അന്വേഷണ ഏജന്‍സികള്‍ തന്നെയാകും. സംസ്ഥാനത്തിന്റെ വികസന മുരടിപ്പിനെ എങ്ങനെ മാറ്റാം എന്നതിന് ഉത്തരമായാണ് കിഫ്ബി. കിഫ്ബിക്ക് ഒന്നിനെയും ഭയപ്പെടേണ്ടതില്ലെന്നും മുഖ്യമന്ത്രി
തിരുവനന്തപുരം : എല്ലാ മാനദണ്ഡവും പാലിച്ചു പ്രവര്‍ത്തിക്കുന്ന കിഫ്ബിയെ കേന്ദ്ര ഏജന്‍സികള്‍ക്ക് ഒരു ചുക്കും ചെയ്യാനാകില്ലെന്ന് മുഖ്യമന്ത്രി പിണറായി വിജയന്‍. എല്ലാ മാനദണ്ഡവും ലംഘിച്ചുള്ള ഇടപെടലാണ് അന്വേഷണ ഏജന്‍സികളുടെ ഭാഗത്ത് നിന്നുണ്ടായത്.കിഫ്ബിയെ അപമാനിച്ചു കളയാം എന്നു കരുതുകയാണെങ്കില്‍ അപമാനിക്കപ്പെടുക അന്വേഷണ ഏജന്‍സികള്‍ തന്നെയാകും. സംസ്ഥാനത്തിന്റെ വികസന മുരടിപ്പിനെ എങ്ങനെ മാറ്റാം എന്നതിന് ഉത്തരമായാണ് കിഫ്ബി. കിഫ്ബിക്ക് ഒന്നിനെയും ഭയപ്പെടേണ്ടതില്ലെന്നും മുഖ്യമന്ത്രി പറഞ്ഞു. ഇതിനെ തകര്‍ക്കാനാണ് കേന്ദ്ര ഏജന്‍സികള്‍ എത്തിയത്. സംസ്ഥാനവും കേന്ദ്രവും തമ്മില്‍ പാലിക്കേണ്ട മര്യാദകളുണ്ട്. അധികാരം ഉണ്ടെന്ന് വച്ച് എവിടെയും ചെന്നുകയറലല്ല വേണ്ടതെന്ന് മുഖ്യമന്ത്രി മുന്നറിയിപ്പ് നല്‍കി.
കേരളത്തിന്റെ വികസന മുരടിപ്പിനെ എങ്ങനെ മാറ്റാം എന്നതിന് ഉത്തരമായാണ് കിഫ്ബി രൂപികരിച്ചത്. എല്ലാവര്‍ക്കും മാറ്റത്തിന്റെ രുചിയറിയാന്‍ സാധിക്കുന്നു. കിഫ്ബിയിലൂടെ വലിയ മാറ്റം ഉണ്ടാക്കാന്‍ സാധിച്ചു. എന്നാല്‍, കോണ്‍ഗ്രസിനും ബിജെപിക്കും ഇതിനോട് അപ്രിയമാണ്. നാട്ടില്‍ വികസനം നടക്കരുത് എന്നതാണ് ഇവരുടെ ലക്ഷ്യം. അതിന്റെ ഫലമായാണ് കിഫ്ബിയെ തകര്‍ക്കാനുള്ള നീക്കം. ഒരു ദിവസം പെട്ടെന്ന് ഉണ്ടായ തല്ല കിഫ്ബി; നിയമസഭയുടെ ഉല്‍പന്നമാണ്. ഇത്തരത്തിലെ ഒരു പ്രൊഫഷണല്‍ സ്ഥാപനത്തെ ഓലപാമ്പ് കാട്ടി ഭയപ്പെടുത്താന്‍ വരേണ്ട. കിഫ്ബി ആര്‍ബിഐ അനുമതിയോടെയാണ് പ്രവര്‍ത്തിക്കുന്നതെന്ന് കേന്ദ്ര സര്‍ക്കാരിനും സമ്മതിക്കേണ്ടി വന്നു.
കിഫ്‌ക്കെതിരെ ഉയര്‍ന്ന ആരോപണങ്ങള്‍ ചീട്ടുക്കൊട്ടാരം പോലെ തകരുന്നതാണ് കാണാന്‍ സാധിച്ചത്. ഇപ്പോള്‍ ബാക്കിയുള്ളവര്‍ ക്ഷീണിച്ചപ്പോള്‍ ആദായ നികുതി വകുപ്പ് എത്തി. അവര്‍ അറിയേണ്ട കാര്യങ്ങള്‍ ചോദിക്കാം. അതിന് കിഫ്ബി മറുപടിയും നല്‍കി. പിന്നെ എന്തിനാണ് ഈ ഓഫീസില്‍ പോയി അവര്‍ കയറിയത്. ഫെഡറല്‍ തത്വം പാലിക്കുന്നവരാണെങ്കില്‍ ഇങ്ങനെ ചെയ്യില്ലെന്ന് മുഖ്യമന്ത്രി ചൂണ്ടിക്കാട്ടി.
