രാജ്യാന്തര മയക്കുമരുന്നു ലോബിയുമായി ബന്ധമുള്ള നാല് വിദേശികളെയാണ് പോലീസ് പിടികൂടിയത്
മസ്‌കത്ത് : കടലില്‍ പട്രോളിംഗ് നടത്തുകയായിരുന്ന പോലീസ് പട്രോള്‍ സംഘത്തിന്റെ നേതൃത്വത്തില്‍ മയക്കു മരുന്നുമായി നാല് വിദേശികളെ അറസ്റ്റ് ചെയ്തു.
റോയല്‍ എയര്‍ഫോഴ്‌സിന്റെ സഹായത്താലാണ് ഇവരെ കടലില്‍ കണ്ടെത്തിയത്. വിവരങ്ങളുടെ അടിസ്ഥാനത്തില്‍ പാഞ്ഞെത്തിയ പോലീസ് ഇവരെ പിടികൂടുകയായിരുന്നു.
ഇവര്‍ക്കായി കടപ്പുറത്ത് കാത്തുനിന്ന് രണ്ട് ഏജന്റുമാരേയും പോലീസ് പിടികൂടി. ഇവരുടെ കൈയ്യിലും മയക്കുമരുന്ന് ശേഖരം ഉണ്ടായിരുന്നു.
മയക്കു മരുന്നു കടത്തിയ ബോട്ടും പോലീസ് കസ്റ്റഡിയില്‍ എടുത്തു. ഇവരില്‍ നിന്ന് 151 കിലോ മയക്കു മരുന്ന് കണ്ടെടുത്തു.
ഇതില്‍ 121 കിലോ ഹാഷിഷും 33 കിലോഗ്രാം ക്രിസ്റ്റല്‍ 10 കിലോ ഗ്രാം മോര്‍ഫിന്‍ എന്നിവയുണ്ടായിരുന്നു. ബോട്ടിന്റെ രഹസ്യ അറയില്‍ നിന്നും 14,6850 മയക്കു മരുന്നു ഗുളികകളും കണ്ടെത്തി.
ഒമാന്‍ തീരപ്രദേശങ്ങള്‍ കേന്ദ്രീകരിച്ച് മത്സ്യബന്ധനത്തിന്റെ മറവില്‍ വിദേശ കപ്പലുകളില്‍ നിന്നു മയക്കു മരുന്ന് കടത്ത് നടത്തുന്നതായി സൂചന ലഭിച്ചതിന്റെ അടിസ്ഥാനത്തിലാണ് റോമന്‍ ഒമാന്‍ പോലീസ് അന്വേഷണം നടത്തിയത്.
