സൗദിയില്‍ താമസ സ്ഥലത്ത് പെയിന്റ് ടിന്നില്‍ തീയിട്ട ശേഷം ഉറങ്ങാന്‍ പോയ മലയാളിയാണ് പുക ശ്വസിച്ച് മരിച്ചത്.
അബുദാബി : ഗള്‍ഫ് രാജ്യങ്ങളില്‍ തണുത്ത കാലാവസ്ഥ തുടരുന്നു. ഖത്തര്‍ ഉള്‍പ്പടെ വിവിധ രാജ്യങ്ങളില്‍ പകല്‍ താപനില 20 ഡിഗ്രിയില്‍ താഴെയാണ്.
സൗദിയിലെ ഖമീസ് മുഷ് യത് പ്രവിശ്യയില്‍ കടുത്ത തണുപ്പിനെ തുടര്‍ന്ന് മുറിയില്‍ പെയിന്റു ടിന്നില്‍ തീ കൂട്ടിയ ശേഷം കിടന്നുറങ്ങിയ മലയാളി യുവാവ് വിഷ പുക ശ്വസിച്ച് മരിച്ചു.
പത്തനം തിട്ട സ്വദേശി സുഭാഷ് (41) ആണ് മരിച്ചത്. കൊടും തണുപ്പിനെ തുടര്‍ന്നാണ് സുഭാഷ് മുറിക്കുള്ളില്‍ പെയിന്റു ടിന്നില്‍ കല്‍ക്കരി കത്തിച്ച് തീയിട്ട ശേഷം ഉറങ്ങാന്‍ പോയത്. അടച്ചിട്ട മുറിയില്‍ വിഷപ്പുക നിറഞ്ഞതിനെ തുടര്‍ന്ന് സുഭാഷ് മരണമടയുകയായിരുന്നു.
സ്വദേശി പൗരന്റെ ഡ്രൈവറായി ജോലി നോക്കുകയായിരുന്നു. തണുപ്പു കാലമായതിനാല്‍ മുറിയില്‍ തീ കത്തിച്ച് ചൂടുകായുക പതിവായിരുന്നു. രാവിലെയാണ് സുഭാഷിനെ മരിച്ച നിലയില്‍ കണ്ടെത്തിയത്. പത്തനം തിട്ട തെങ്ങമം സ്വദേശിയായ സുഭാഷിിന് ഭാര്യയും രണ്ട് കുട്ടികളുമുണ്ട്. മൃതദേഹം നാട്ടിലെത്തിച്ചു.
യുഎഇയില്‍ കൂടിയ താപനില 16 നും 21 നും ഇടയിലാകുമെന്നും കുറഞ്ഞ താപനില ആറു ഡിഗ്രി വരെ താഴാമെന്നും കാലാവസ്ഥ നിരീക്ഷണ കേന്ദ്രം അറിയിച്ചു.
റാസല്‍ ഖൈമയിലെ ജബല്‍ജെയ്‌സ് കൊടുമുടിയില്‍ പൂജ്യം ഡിഗ്രിയിലും താഴെ രേഖപ്പെടുത്തി.
ഖത്തറില്‍ അബു സംറയില്‍ ശനിയാഴ്ച രാവിലെ മൈനസ് ഡിഗ്രിയിലേക്ക് താഴ്ന്നു. മൈനസ് 2.4 ആണ് ഇവിടെ രേഖപ്പെടുത്തിയത്. ഖത്തര്‍ തലസ്ഥാനമായ ദോഹയില്‍ ഏഴ് ഡിഗ്രിയായിരുന്നു. അന്തരീക്ഷ താപനില,
ബഹ്‌റൈനില്‍ തണുത്ത കാലാവസ്ഥയ്‌ക്കൊപ്പം ശക്തമായ തണുത്ത കാറ്റും വീശുന്നുണ്ട്. മണിക്കൂറില്‍ 55 മുതല്‍ 120 കിലോമീറ്റര്‍ വരെയാണ് കാറ്റിന്റെ വേഗത.
യുഎഇയിലും ഇതര ജിസിസി രാജ്യങ്ങളിലും പൊടിക്കാറ്റുമുണ്ട്. ഇതു മൂലം ദൂരക്കാഴ്ച കുറവാണ്. വാഹനമോടിക്കുന്നവര്‍ ജാഗ്രത പാലിക്കണമെന്ന് അധികൃതര്‍ അറിയിച്ചു.
