ദുബായ്: യുഎഇയില്‍ കാലാവധി കഴിഞ്ഞ വിസിറ്റിങ് വിസകള്‍ മാര്‍ച്ച് 31 വരെ നീട്ടിയതായി റിപ്പോര്‍ട്ട്. കാലാവധി കഴിഞ്ഞ വിസക്കാര്‍ എമിഗ്രേഷന്റെ വെബ്‌സൈറ്റില്‍ പരിശോധിച്ചപ്പോഴാണ് കാലാവധി നീട്ടിക്കിട്ടിയതായി കണ്ടത്. ഡിസംബറില്‍ വിസ തീര്‍ന്നവരുടെ കാലാവധിയും ഇത്തരത്തില്‍ നീട്ടിയതായി കാണുന്നുണ്ട്. അതേസമയം ഇത് സംബന്ധിച്ച് ഔദ്യോഗിക വിശദീകരണം ഇതുവരെ വന്നിട്ടില്ല.
കാലാവധി നീട്ടിയാല്‍ യുഎഇയില്‍ കുടുങ്ങിയ പ്രവാസികള്‍ക്ക് അതൊരു ആശ്വാസമാകും. വിസ കഴിഞ്ഞും യുഎഇയില്‍ തങ്ങുന്നവരും അടുത്ത ദിവസങ്ങളില്‍ വിസാ കാലാവധി കഴിയുന്നവരുമുണ്ട്. ഇത്തരത്തില്‍ വിസാ കാലാവധി കഴിഞ്ഞ് തങ്ങിയാല്‍ വന്‍ തുക പിഴ അടക്കേണ്ടി വരും. സൗദി വിമാന വിലക്ക് അനിശ്ചിതമായി നീട്ടിയത് മൂലം എത്ര ദിവസം ഇവിടെ തങ്ങേണ്ടി വരുമെന്ന് അറിയാതെയാണ് പ്രവാസികള്‍ ഇവിടെ കഴിയുന്നത്. വിസ പുതുക്കണമെങ്കില്‍ ഏകദേശം 1000 ദിര്‍ഹമെങ്കിലും വേണ്ടിവരും. വളരെ ബുദ്ധിമുട്ടി പണമില്ലാത്ത അവസ്ഥയില്‍ കഴിയുന്ന പ്രവാസികള്‍ക്ക് ആശ്വാസ വാര്‍ത്തയാണിത്.
