മുംബൈ: ബോളീവുഡ് താരം സുശാന്ത് സിംഗ് രജ്പുതിന്റെ മരണവുമായി ബന്ധപ്പെട്ട മയക്കുമരുന്ന് കേസില്‍ അറസ്റ്റിലായ നടി റിയ ചക്രബര്‍ത്തിക്ക് ജാമ്യമില്ല. റിയ, സഹോദരന്‍ ഷോവിക് ചക്രബര്‍ത്തി എന്നിവരടക്കം എട്ടുപേര്‍ക്കാണ് മുംബൈ പ്രത്യേക കോടതി ജാമ്യം നിഷേധിച്ചത്.
നര്‍ക്കോട്ടിക് കണ്‍ട്രോള്‍ ബ്യൂറോ സെപ്റ്റംബര്‍ എട്ടിനാണ് മയക്കുമരുന്ന് ഇടപാട് നടത്തിയെന്ന കുറ്റം ചുമത്തി റിയ ചക്രബര്‍ത്തിയെ അറസ്റ്റ് ചെയ്തത്. ഈ മാസം 22-വരെ ജുഡീഷ്യല്‍ കസ്റ്റഡിയിലുള്ള റിയ നിലവില്‍ ബൈക്കുല്ല ജില്ല ജയിലിലാണുള്ളത്.
അതേസമയം വിചാരണ കോടതി ജാമ്യം നിഷേധിച്ചതിന് പിന്നാലെ ബോംബെ ഹൈക്കോടതിയെ സമീപിക്കുമെന്ന് റിയയുടെ അഭിഭാഷകന്‍ അറിയിച്ചു. താന്‍ ഒരു തെറ്റും ചെയ്തിട്ടില്ലെന്നും നിര്‍ബന്ധിച്ച് കുറ്റം സമ്മതിച്ചതാണെന്നും റിയ ജാമ്യാപേക്ഷയില്‍ പറഞ്ഞു.
തനിക്കുനേരെ കൊലപാതക ഭീഷണിയും ബലാത്സംഗ ഭീഷണിയും ഉണ്ടായെന്നും പലരീതിയിലുള്ള അന്വേഷണങ്ങളും നടത്തി മാനസികമായി പീഡിപ്പിക്കുകയാണെന്നും റിയ ജാമ്യാപേക്ഷയില്‍ പറയുന്നു.
എന്നാല്‍ റിയക്ക് ജാമ്യം നല്‍കിയാല്‍ സമൂഹത്തിലെ അവരുടെ സ്ഥാനവും പണവും ഉപയോഗിച്ച് സാക്ഷികളെ സ്വാധീനിക്കുമെന്നും തെളിവുകള്‍ നശിപ്പിക്കുമെന്നും എന്‍സിബി കോടതിയില്‍ വാദിച്ചു.
