ന്യൂഡല്‍ഹി: എസ്എന്‍സി ലാവിലിന്‍ കേസില്‍ വാദം കേള്‍ക്കുന്നത് രണ്ടാഴ്ചത്തേക്ക് മാറ്റിവയ്ക്കാന്‍ സുപ്രീംകോടതിയില്‍ അപേക്ഷ നല്‍കി സിബിഐ. മുഖ്യമന്ത്രി പിണറായി വിജയന്‍ ഉള്‍പ്പടെയുള്ളവരെ വെറുതെവിട്ട ഹൈക്കോടതി വിധിക്കെതിരെ നല്‍കിയ ഹര്‍ജി നാളെ പരിഗണിക്കാനിരിക്കവെയാണ് സിബിഐയുടെ നിര്‍ണായക നീക്കം.
രണ്ട് കോടതികള്‍ വെറുതെവിട്ട കേസായതിനാല്‍ ഇനി കേസില്‍ വാദം കേള്‍ക്കുമ്പോള്‍ ശക്തമായ വാദമുഖങ്ങളുമായി വരണമെന്ന് ഒക്ടോബര്‍ എട്ടിന് വാദം കേട്ടപ്പോള്‍ സിബിഐയോട് കോടതി വ്യക്തമാക്കിയിരുന്നു. ഈ സാഹചര്യത്തിലാണ് കേസില്‍ വാദം കേള്‍ക്കുന്നത് രണ്ടാഴ്ച കൂടി നീട്ടിവച്ച് കൂടുതല്‍ സമയം നല്‍കണമെന്ന് സിബിഐ കോടതിയില്‍ അപേക്ഷ നല്‍കുന്നത്. സിബിഐക്ക് പറയാനുള്ളതെല്ലാം ഒരു കുറിപ്പായി സമര്‍പ്പിക്കാനാണ് ജസ്റ്റിസ് യു.യു ലളിത് അധ്യക്ഷനായ ബെഞ്ച് അന്ന് ആവശ്യപ്പെട്ടത്.
