മുംബൈ: ഓഹരി വിപണി വീണ്ടും റെക്കോഡ്‌ ഉയരങ്ങളിലേക്ക്‌ നീങ്ങുന്നു. സെന്‍സെക്‌സ്‌ ഇന്ന് ആദ്യമായി 44,000 പോയിന്റ്‌ തൊട്ടു. സെന്‍സെക്‌സ്‌ 314 പോയിന്റും നിഫ്‌റ്റി 93 പോയിന്റും ഉയര്‍ന്നു. നിഫ്‌റ്റി ഇന്ന് ആദ്യമായി 12,800ന് മുകളില്‍ ക്ലോസ്‌ ചെയ്തു.
സെന്‍സെക്‌സ്‌ 43952.71 പോയിന്റിലും നിഫ്‌റ്റി 12874.20 പോയിന്റിലുമാണ്‌ ക്ലോസ്‌ ചെയ്‌തത്‌. നിഫ്‌റ്റിയില്‍ ഏകദേശം 150 പോയിന്റ്‌ വ്യതിയാനം വ്യാപാരത്തിനിടെ ഉണ്ടായി. 12,797 പോയിന്റ്‌ ആണ്‌ ഇന്നത്തെ താഴ്‌ന്ന നില. നിഫ്‌റ്റി 12,934 പോയിന്റ്‌ വരെയാണ്‌ ഇന്ന് ഉയര്‍ന്നത്‌.
ഇന്നത്തെ മുന്നേറ്റത്തില്‍ പ്രധാന സംഭാവന ചെയ്‌തത്‌ മെറ്റല്‍, ബാങ്ക്‌ ഓഹരികളാണ്‌. നിഫ്‌റ്റി ബാങ്ക്‌ സൂചിക 2.05 ശതമാനവും നിഫ്‌റ്റി മെറ്റല്‍ സൂചിക 2.49 ശതമാനവും ഉയര്‍ന്നു.
ടാറ്റാ മോട്ടോഴ്‌സ്‌, ടാറ്റാ സ്റ്റീല്‍, എച്ച്‌ഡിഎഎഫ്‌സി ലൈഫ്, എസ്‌ബിഐ, അദാനി പോര്‍ട്‌സ്‌ എന്നിവയാണ്‌ ഏറ്റവും ഉയര്‍ന്ന നേട്ടം രേഖപ്പെടുത്തിയ 5 നിഫ്‌റ്റി ഓഹരികള്‍. ടാറ്റാ മോട്ടോഴ്‌സ്‌ 6.15 ശതമാനം ഉയര്‍ന്നു. ടാറ്റാ സ്റ്റീല്‍, എച്ച്‌ഡിഎഎഫ്‌സി ലൈഫ്, എസ്‌ബിഐ എന്നീ ഓഹരികള്‍ 5 ശതമാനത്തിന്‌ മുകളില്‍ നേട്ടം രേഖപ്പെടുത്തി.
നിഫ്‌റ്റിയില്‍ ഉള്‍പ്പെട്ട ഭൂരിഭാഗം ഓഹരികളും ഇന്ന് നേട്ടം രേഖപ്പെടുത്തി. നിഫ്‌റ്റിയില്‍ ഉള്‍പ്പെട്ട 50 ഓഹരികളില്‍ 30 ഓഹരികള്‍ നേട്ടമുണ്ടാക്കിയപ്പോള്‍ 20 ഓഹരികളാണ്‌ നഷ്‌ടത്തിലായത്‌. ബിപിസിഎല്‍, ഹീറോ മോട്ടോഴ്‌സ്‌, എന്‍ടിപിസി, ഒന്‍ജിസി, ഐഒസി തുടങ്ങിയ ഓഹരികള്‍ നഷ്‌ടം നേരിട്ടു.
