വാഷിങ്ടണ് ഡിസി: അമേരിക്കന് പ്രസിഡന്റ് തെരഞ്ഞെടുപ്പിന് ദിവസങ്ങള് മാത്രം ശേഷിക്കെ സുപ്രീംകോടതി ജഡ്ജിയായി ഡൊണാള്ഡ് ട്രംപ് നാമനിര്ദേശം ചെയ്ത അമി കോണി ബാരറ്റിനെ തെരഞ്ഞെടുത്തു. റിപ്പബ്ലിക് പാര്ട്ടിക്ക് ഭൂരിപക്ഷമുള്ള സെനറ്റില് 48-നെതിരെ 52 വോട്ടുകള് നേടിയാണ് അമി ബാരറ്റ് ജഡ്ജിയാകുന്നത്.
ജസ്റ്റിസ് റുത്ത് ബാഡര് ഗിന്സ്ബര്ഗ് സെപ്റ്റംബറില് അന്തരിച്ചതിനെ തുടര്ന്നാണ് പുതിയ ജഡ്ജിയെ തെരഞ്ഞെടുത്തത്. പ്രസിഡന്റ് ഡൊണാള്ഡ് ട്രംപിന്റെ സാന്നിധ്യത്തില് അമി ബാരറ്റ് വൈറ്റ്ഹൗസില് വെച്ച് സത്യപ്രതിജ്ഞ ചെയ്തു.
അന്തരിച്ച ജസ്റ്റിസ് റുത്ത് ബാഡര് സ്ത്രീപക്ഷ അവകാശങ്ങള്ക്കായി നിലകൊണ്ടിരുന്ന വ്യക്തിയായിരുന്നെങ്കില് അമേരിക്കന് യാഥാസ്ഥിതിക ചിന്താഗതിക്കാരുടെ പ്രിയങ്കരിയാണ് അമി ബാരറ്റ്. ഭ്രൂണഹത്യ, സ്വവര്ഗ വിവാഹം എന്നിവക്കെതിരെ ഇവര് നേരത്തെ നിലപാടെടുത്തിരുന്നു.
ജുഡീഷ്യല് ബോഡിയിലേക്ക് ട്രംപ് നിയമിക്കുന്ന മൂന്നാമത്തെ വ്യക്തിയാണ് അമി ബാരറ്റ്. അമേരിക്കയ്ക്കും അമേരിക്കന് ഭരണഘടനയ്ക്കും ന്യായവും നിഷ്പക്ഷവുമായ നിയമ വാഴ്ചക്കുള്ള സുപ്രധാന ദിവസമാണിതെന്ന് സത്യപ്രതിജ്ഞാ ചടങ്ങില് ട്രംപ് പ്രതികരിച്ചു.
അതേസമയം തെരഞ്ഞെടുപ്പ് അടുത്തിരിക്കെ ട്രംപിന്റെ പിന്തുണയുള്ള പുതിയ ജഡ്ജിനെ നിയമിച്ചത് മറ്റു ആശങ്കകള്ക്കും വഴിവെക്കുന്നുണ്ട്. നവംബര് മൂന്നിന് നടക്കുന്ന തെരഞ്ഞെടുപ്പില് വിജയിക്കുന്ന വ്യക്തിയാണ് പുതിയ ജഡ്ജിയെ നാമനിര്ദേശം ചെയ്യേണ്ടതെന്ന് ഡെമോക്രാറ്റിക് പാര്ട്ടി നേരത്തെ ആവശ്യപ്പെട്ടിരുന്നു.
