ജോലി ചെയ്തു ജീവിക്കാന് ഈ സമൂഹം അനുവദിക്കുന്നില്ലെന്ന് കണ്ണീരോടെ ട്രാന്സ്ജന്ഡര് യുവതി സജന ഷാജി. സജനയും സുഹൃത്തുക്കളും നടത്തുന്ന ബിരിയാണി കച്ചവടത്തിനെതിരെ നിരന്തരമായി അധിക്ഷേപങ്ങള് നേരിടേണ്ടി വരുന്നുവെന്നും പലരും കച്ചവടം ചെയ്യാന് അനുവദിക്കുന്നില്ലെന്നും സജന ഫേസ്ബുക്ക് ലൈവില് പറഞ്ഞു.
‘ഇന്നുണ്ടായിക്കിയ ഭക്ഷണം മുഴുവന് ബാക്കിയായി, 20 ഊണും 150 ബിരിയാണിയുമാണ് ഉണ്ടാക്കിയത്. ആകെ വിറ്റുപോയത് 20 ബിരിയാണി മാത്രമാണ്. എന്തുചെയ്യണം എന്നറിയില്ല. നാളെ സാധനം എടുക്കാന് പോലും പണമില്ല. ഉണ്ടായിരുന്നതെല്ലാം വിറ്റുപൊറുക്കിയാണ് ഞങ്ങള് ബിരിയാണി കച്ചവടം തുടങ്ങിയത്.’ – സജിന സങ്കടത്തോടെ പറയുന്നു.
https://www.facebook.com/100009608629820/videos/2641949012802027/
എറണാകുളം ഇരുമ്പനത്ത് വഴിയരികില് ഭക്ഷണം വിറ്റ് ജിവിക്കുകയാണ് സജനയടക്കമുള്ള അഞ്ച് ട്രാന്സ്ജന്ഡേഴ്സ്. സജനയുടെ സംരംഭം സമൂഹ മാധ്യമങ്ങളിലും ശ്രദ്ധ നേടിയിരുന്നു. എന്നാല് തൊട്ടടുത്ത് കച്ചവടം നടത്തുന്ന സംഘം തങ്ങളെ അധിക്ഷേപിക്കുകയാണെന്നും കച്ചവടം മുടക്കുകയാണെന്നും സജന ലൈവില് പറയുന്നു.
പരാതി നല്കിയിട്ട് പോലീസുകാരും വിഷയത്തില് ഇടപെടാന് തയ്യാറായില്ലെന്ന് അവര് പറഞ്ഞു. അഞ്ചു ട്രാന്സ്ജന്ഡര് വ്യക്തികളുടെ ജിവിതമാര്ഗമാണ് ഈ വരുമാനം എന്നും അധികാരികളില് ഈ വിഷയം എത്തിക്കണമെന്നും സജന പറയുന്നു.
