2021 ലെ റിപ്പബ്ലിക് ദിനാഘോഷങ്ങളില്‍ പങ്കെടുത്തവര്‍ക്കുള്ള പുരസ്‌കാരങ്ങള്‍ യുവജനകാര്യ-കായിക മന്ത്രാലയ സഹമന്ത്രി ശ്രീ കിരണ്‍ റിജിജു ന്യൂഡല്‍ഹിയില്‍ വിതരണം ചെയ്തു. പരേഡില്‍ പ്രദര്‍ശിപ്പിക്കപ്പെട്ട 32 നിശ്ചല ദൃശ്യങ്ങളില്‍ ഏറ്റവും മികച്ചതിനുള്ള പുരസ്‌കാരം ഉത്തര്‍പ്രദേശിന് ലഭിച്ചു. സംസ്ഥാന/കേന്ദ്രഭരണ പ്രദേശങ്ങളില്‍ നിന്ന് 17 ഉം, വിവിധ മന്ത്രാലയങ്ങള്‍, വകുപ്പുകള്‍, അര്‍ദ്ധ സൈനിക വിഭാഗങ്ങള്‍ എന്നിവയില്‍നിന്ന് ഒന്‍പതും, പ്രതിരോധ മന്ത്രാലയത്തില്‍ നിന്ന് ആറും നിശ്ചലദൃശ്യങ്ങള്‍ ആണ് പരേഡില്‍ ഉള്‍പ്പെടുത്തിയിരുന്നത്.
അയോധ്യ: ഉത്തര്‍പ്രദേശിന്റെ സാംസ്‌കാരിക പൈതൃകം എന്ന വിഷയത്തെ ആസ്പദമാക്കിയാണ് ഉത്തര്‍പ്രദേശ് തങ്ങളുടെ നിശ്ചലദൃശ്യം തയ്യാറാക്കിയത്. മികച്ച നിശ്ചലദൃശ്യങ്ങള്‍ക്കുള്ള രണ്ടും മൂന്നും പുരസ്‌കാരങ്ങള്‍ യഥാക്രമം ത്രിപുരയും, ഉത്തരാഖണ്ഡും നേടി.
വിവിധ മന്ത്രാലയങ്ങള്‍, വകുപ്പുകള്‍, അര്‍ധസൈനിക വിഭാഗങ്ങള്‍ എന്നിവയുടെ വിഭാഗത്തില്‍ സ്വാശ്രയ ഭാരത പ്രചരണം: കോവിഡ്, എന്നത് പ്രമേയമാക്കി ജൈവസാങ്കേതികവിദ്യ വകുപ്പ് തയ്യാറാക്കിയ നിശ്ചല ദൃശ്യത്തിനാണ് പുരസ്‌കാരം.
അനശ്വര സൈനികന്‍ (അമര്‍ ജവാന്‍) എന്ന പ്രമേയം അടിസ്ഥാനമാക്കി കേന്ദ്ര പൊതുമരാമത്ത് വകുപ്പ് ഒരുക്കിയ നിശ്ചല ദൃശ്യത്തിനു സായുധ സേനകളിലെ വീര യോദ്ധാക്കള്‍ക്കുള്ള ആദരസൂചകമായി പ്രത്യേക പുരസ്‌കാരവും ലഭിച്ചു.
ന്യൂഡല്‍ഹിയിലെ മൗണ്ട് അബു പൊതുവിദ്യാലയം, വിദ്യാഭാരതി സ്‌കൂള്‍ രോഹിണി എന്നിവിടങ്ങളിലെ വിദ്യാര്‍ത്ഥികള്‍ക്ക് മികച്ച സാംസ്‌കാരിക പ്രകടനത്തിനുള്ള പുരസ്‌കാരവും ശ്രീ റിജിജു കൈമാറി.
റിപ്പബ്ലിക് ദിന പരേഡില്‍ പങ്കെടുത്ത നിരവധി കലാകാരന്‍മാരും വിദ്യാര്‍ത്ഥികളും ചടങ്ങില്‍ സന്നിഹിതരായിരുന്നു
