കൊച്ചി: ശിശുക്ഷേമ സമിതി ഏറ്റെടുത്ത പതിനാല് വയസ്സുകാരി മരിച്ച സംഭവത്തില്‍ ദുരൂഹതയില്ലെന്ന് പോലീസ്. കുട്ടിയുടെ മരണകാരണം ന്യുമോണിയ ആണെന്ന് കൊച്ചി ഡിസിപി ഐശ്വര്യ ഡോങ് രെ പറഞ്ഞു.ഡിഡബ്ല്യുസിക്ക് വീഴ്ച പറ്റിയിട്ടില്ലെന്നും പോസ്റ്റ്‌മോര്‍ട്ടം റിപ്പോര്‍ട്ടില്‍ ഇക്കാര്യം വ്യക്തമാക്കിയിട്ടുണ്ടെന്നും ഡിസിപി വ്യക്തമാക്കി. അതേസമയം വിശദമായ അന്വേഷണം നടത്തുമെന്നും ഡിസിപി അറിയിച്ചു. കുട്ടിയുടെ മരണത്തില്‍ ദുരൂഹതയുണ്ടെന്ന് ആരോപിച്ച് നാട്ടുകാര്‍ പ്രതിഷേധിച്ചിരുന്നു. പോസ്റ്റ്‌മോര്‍ട്ടം നടത്തിയ ശേഷം കാക്കനാട് ചില്‍ഡ്രന്‍സ് ഹോമില്‍ എത്തിച്ച മൃതദേഹം ആംബുലന്‍സില്‍ നിന്നിറക്കാന്‍ സമ്മതിക്കാതെയാണ് നാട്ടുകാര്‍ പ്രതിഷേധിച്ചത്.
രണ്ട് വര്‍ഷം മുന്‍പ് അച്ഛന്റെ പീഡനത്തിനിരയായതിനെ തുടര്‍ന്നാണ് കുട്ടിയുടെ സംരക്ഷണം ശിശുക്ഷേമ സമിതി ഏറ്റെടുത്തത്. സമിതിയുടെ നിയന്ത്രണത്തിലുളള പച്ചാളത്തെ സ്ഥാപനത്തിലാണ് പെണ്‍കുട്ടിയെ തമാസിപ്പിച്ചിരുന്നത്. കഴിഞ്ഞ ദിവസമാണ് പെണ്‍കുട്ടി മരിച്ചത്. പീഡനക്കേസില്‍ വിചാരണ ആരംഭിക്കാനിരിക്കെയാണ് പെണ്‍കുട്ടിയുടെ മരണം. ഇതാണ് നാട്ടുകാരിലും സംശയമുണര്‍ത്തുന്നത്. കുട്ടിയുടെ മരണത്തില്‍ ദുരൂഹതയുണ്ടെന്നും അസുഖ വിവരം ആരെയും അറിയിച്ചില്ലെന്നുമായിരുന്നു ബന്ധുക്കളുടെയും നാട്ടുകാരുടെയും ആരോപണം.
