കൊച്ചി: പന്തീരാങ്കാവ് യുഎപിഎ കേസില്‍ വിജിത്ത് വിജയനെതിരെ ഗുരുതര ആരോപണവുമായി എന്‍ഐഎ. കേസില്‍ ഒളിവിലുള്ള സി.പി. ഉസ്മാനുമായി നിരവധി തവണ വിജിത്ത് കൂടിക്കാഴ്ച നടത്തിയെന്നും ഒളിവിലുള്ള സിപിഐ മാവോയിസ്റ്റുകള്‍ക്ക് ഭക്ഷണവും വസ്ത്രങ്ങളുമെത്തിക്കുന്നത് വിജിത്താണെന്നും എന്‍ഐഎ ആരോപിക്കുന്നു. കഴിഞ്ഞ ദിവസമാണ് യുഎപിഎ ചുമത്തി വിജിത്തിനെ അറസ്റ്റ് ചെയ്തത്.
മാവോയിസ്റ്റ് പ്രസിദ്ധീകരണ വിഭാഗത്തില്‍ അംഗമാണ്. വിജിത്താണ് മാവോയിസ്റ്റ് സാഹിത്യങ്ങള്‍ ഇംഗ്ലീഷില്‍ നിന്ന് മലയാളത്തിലേക്ക് വിവര്‍ത്തനം ചെയ്യുന്നതെന്നും എന്‍ഐഎ റിമാന്‍ഡ് റിപ്പോര്‍ട്ടില്‍ പറയുന്നു. വൈത്തിരിയില്‍ ഏറ്റുമുട്ടലില്‍ കൊല്ലപ്പെട്ട ജലീലുമായി വിജിത്തിന് അടുത്ത ബന്ധമാണ്. ഉസ്മാന്‍, ജലീല്‍ എന്നിവരുമൊത്ത് വിവിധ ജില്ലകളില്‍ ഗൂഡാലോചനയില്‍ പങ്കടുത്തു.
വിജിത്തില്‍ നിന്ന് ഡിജിറ്റല്‍ തെളിവുകള്‍ ഉള്‍പ്പെടെ ലഭിച്ചു. സംഘടനയില്‍ വിജിത് അറിയപ്പെടുന്നത് പച്ച, ബാലു, മുസഫിര്‍, അജയ് എന്നീ പേരുകളിലാണെന്നും എന്‍ഐഎ പറയുന്നു. പന്തീരാങ്കാവ് കേസിലെ നാലാം പ്രതിയാണ് വിജിത്ത് വിജയന്‍. അലന്‍ ഷുഹൈബ്, താഹ ഫസല്‍ എന്നിവരുമായി ബന്ധമുള്ളയാളാണ് വിജിത്ത് അലനെയും താഹയെയും മാവോയിസ്റ്റ് സംഘടനയില്‍ ചേര്‍ത്തത് ഇയാളാണെന്ന് എന്‍ഐഎ ആരോപിക്കുന്നു.
