ന്യൂഡല്‍ഹി: കോവിഡ് വാക്‌സിന്റെ ഉപയോഗത്തിന് അനുമതി നല്‍കുന്ന കാര്യം തീരുമാനിക്കാന്‍ വിദഗ്ധ സമിതിയുടെ നിര്‍ണായക യോഗം ഇന്ന്. ഉച്ചയ്ക്ക് 12 മണിക്കാണ് യോഗം. സീറം ഇന്‍സ്റ്റിറ്റ്യൂട്ട്, ഭാരത് ബയോടെക്ക്, ഫൈസര്‍ എന്നീ കമ്പനികളുടെ അപേക്ഷ സമിതി പരിഗണിക്കും.
കഴിഞ്ഞ ദിവസം പ്രധാനമന്ത്രി നടത്തിയ പ്രസംഗത്തില്‍ വാക്സിന് ഉടന്‍ അനുമതി നല്‍കുമെന്ന് അറിയിച്ചിരുന്നു. ഡ്രഗ്സ് കണ്‍ട്രോളര്‍ ജനറല്‍ ഓഫ് ഇന്ത്യയും ഇത് സംബന്ധിച്ച് പ്രതികരിച്ചിരുന്നു. പുതുവര്‍ഷത്തില്‍ പുതിയ തീരുമാനമുണ്ടാകുമെന്നാണ് ഡ്രഗ്സ് കണ്‍ട്രോളര്‍ ജനറല്‍ ഓഫ് ഇന്ത്യ പ്രതികരിച്ചത്.
വിദഗ്ധ സമിതി കഴിഞ്ഞ ദിവസം ചേര്‍ന്ന യോഗത്തില്‍ സിറം ഇന്‍സ്റ്റിറ്റ്യൂട്ടിനോട് സമിതി കൂടുതല്‍ രേഖകള്‍ ചോദിച്ചിരുന്നു. സീറത്തിന്റെ കൊവിഷീല്‍ഡ് വാക്സിന് ഉപയോഗത്തിന് അനുമതി കിട്ടുമെന്നാണ് സൂചന.
