പാലക്കാട്: പാലക്കാട് കുഴല്‍മന്ദത്ത് പ്രണയിച്ച് വിവാഹം കഴിച്ചതിന്റെ പേരില്‍ യുവാവിനെ വെട്ടിക്കൊന്നു. തേങ്കുറിശ്ശി സ്വദേശി അനീഷാണ് കൊല്ലപ്പെട്ടത്. സംഭവത്തില്‍ അനീഷിന്റെ ഭാര്യാ പിതാവിനെ പോലീസ് കസ്റ്റഡിയിലെടുത്തു.
ഒളിവില്‍ കഴിയുകയായിരുന്ന ഭാര്യ ഹരിതയുടെ പിതാവ് പ്രഭുകുമാറിനെ കോയമ്പത്തൂരില്‍ നിന്നാണ് പോലീസ് പിടികൂടിയത്. സംഭവത്തില്‍ അമ്മാവന്‍ സുരേഷിനെ കഴിഞ്ഞ ദിവസം തന്നെ പോലീസ് കസ്റ്റഡിയിലെടുത്തിരുന്നു.
അനീഷിന്റെയും ഹരിതയുടേയും വിവാഹം കഴിഞ്ഞ് മൂന്ന് മാസം ആകുമ്പോഴാണ് കൊലപാതകം. കഴിഞ്ഞ ദിവസം ബൈക്കില്‍ കടയിലേക്ക് പോയ അനീഷിനെയും സഹോദരന്‍ അരുണിനെയും അനീഷിന്റെ ഭാര്യ ഹരിതയുടെ അച്ഛന്‍ പ്രഭുകുമാറും അമ്മാവന്‍ സുരേഷും ചേര്‍ന്ന് വെട്ടുകയായിരുന്നു. ആശുപത്രിയിലേക്ക് കൊണ്ടു പോകുന്ന വഴി അനീഷ് മരിച്ചു.
വിവാഹത്തിന് ശേഷം ഭാര്യാ വീട്ടുകാരില്‍ നിന്ന് അനീഷിന് നിരന്തരം ഭീഷണികള്‍ ഉണ്ടായിരുന്നതായി ബന്ധുക്കള്‍ ആരോപിച്ചു. മൂന്ന് മാസത്തിനുള്ളില്‍ അനീഷിനെ വെട്ടിക്കൊലപ്പെടുത്തുമെന്ന് ഹരിതയുടെ വീട്ടുകാര്‍ പറഞ്ഞതായി സഹോദരനും ദൃക്സാക്ഷിയുമായ അരുണ്‍ പറഞ്ഞു.
