തിരുവനന്തപുരം: സോളാര്‍ കേസില്‍ ഏത് അന്വേഷണവും വരട്ടെയെന്ന് ഉമ്മന്‍ചാണ്ടി. സിബിഐയെ പേടിയില്ല. ഏത് അന്വേഷണത്തോടും സഹകരിക്കുമെന്നും എട്ട് വര്‍ഷത്തിനിടെ ഒരിക്കല്‍ പോലും ഈ കേസിനെ തടസപ്പെടുത്താന്‍ ശ്രമിച്ചിട്ടില്ലെന്നും മാധ്യമങ്ങളോട് പറഞ്ഞു.
നിയമസഭാ തെരഞ്ഞെടുപ്പ് അടുത്തിരിക്കെയാണ് സോളാര്‍ കേസിലെ പീഡന പരാതികളില്‍ സിബിഐ അന്വേഷണത്തിന് സര്‍ക്കാര്‍ തീരുമാനിച്ചത്. കേസില്‍ കമ്മീഷന്‍ റിപ്പോര്‍ട്ട് വന്നിട്ടും ഇതുവരെ തുടര്‍ നടപടികള്‍ എടുക്കാതിരുന്നത് സര്‍ക്കാരിന്റെ നിഷ്‌ക്രിയത്വവും കഴിവില്ലായ്മയുമാണെന്നും ഉമ്മന്‍ചാണ്ടി വിമര്‍ശിച്ചു.
വേങ്ങര തിരഞ്ഞെടുപ്പിനു മുമ്പ് തിരക്കിട്ട് സോളര്‍ കമ്മീഷനില്‍ നടപടി പ്രഖ്യാപിച്ചു. ഒന്നും നടന്നില്ല. കമ്മീഷന്‍ റിപ്പോര്‍ട്ടിനെതിരായ വിധിയിലും സര്‍ക്കാര്‍ അപ്പീല്‍ പോയില്ല. ഇത് ഇടതുസര്‍ക്കാരിന് തിരിച്ചടിക്കുമെന്നും അദ്ദേഹം ചൂണ്ടിക്കാട്ടി. പരാതിക്കാരി വീണ്ടും പരാതി നല്‍കിയതില്‍ ഗൂഢാലോചന ഉണ്ടോയെന്ന് മാധ്യമങ്ങള്‍ക്ക് അന്വേഷിക്കാമെന്നും ഇതുമായി ബന്ധപ്പെട്ട് മാധ്യമങ്ങളുയര്‍ത്തിയ ചോദ്യത്തോട് അദ്ദേഹം പ്രതികരിച്ചു.
