തിരുവനന്തപുരം: രാവിലെ 10 മുതല്‍ രാത്രി 8 വരെ പ്രവര്‍ത്തിക്കുന്ന 242 സപ്ലൈക്കോ വില്‍പ്പനശാലകളില്‍ ജീവനക്കാര്‍ക്ക് ഉപയോഗിക്കാന്‍ ശുചിമുറിയില്ലെന്ന് സപ്ലൈക്കോ.നിലവില്‍ ശുചിമുറി സൗകര്യമില്ലാത്ത എല്ലാ വില്‍പ്പന ശാലകളിലും അടിയന്തിരമായി ശുചിമുറി സൗകര്യം ഒരുക്കണമെന്ന് സംസ്ഥാന മനുഷ്യാവകാശ കമ്മീഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക് സപ്ലൈക്കോ മാനേജിംഗ് ഡയറക്ടര്‍ക്ക് നിര്‍ദ്ദേശം നല്‍കി.
1534 വില്‍പ്പനശാലകളാണ് സപ്ലൈകോയ്ക്ക് സംസ്ഥാനത്തുള്ളത്. സ്ഥാപനങ്ങളിലെ ജീവനക്കാരില്‍ ഭൂരിപക്ഷവും സ്ത്രീകളാണ്. 528 വില്‍പ്പനശാലകളില്‍ ശുചിമുറി സൗകര്യമില്ലെങ്കിലും ഇതില്‍ 286 കേന്ദ്രങ്ങളില്‍ സമീപപ്രദേശത്തുള്ള കടമുറികളില്‍ ശുചിമുറി സൗകര്യമുണ്ടെന്ന് എം ഡിയുടെ റിപ്പോര്‍ട്ടില്‍ പറയുന്നു. ബാക്കിയുള്ള 242 കേന്ദ്രങ്ങളില്‍ ശുചിമുറി സൗകര്യം ലഭ്യമല്ല. ഇതില്‍ കൊല്ലം കടപ്പാക്കടയിലുള്ള മാവേലി സ്റ്റോര്‍ കെട്ടിടം സപ്ലൈക്കോയുടെ ഉടമസ്ഥതതയിലുള്ളതാണ്. ഇവിടെ ശുചിമുറി സ്ഥാപിക്കാമെന്ന് എം ഡി അറിയിച്ചു. സപ്ലൈക്കോ എംപ്ലോയീസ് കോണ്‍ഗ്രസ് പ്രസിഡന്റ് എം. ശശിധരന്‍ നായര്‍ സമര്‍പ്പിച്ച പരാതിയിലാണ് നടപടി.
