നെട്ടൂര് : സാഹോദര്യത്തിന്റെ തണലിലാണ് ഇസ്ലാം മതവും ക്രിസ്തുമതവുമൊക്കെ നമ്മുടെ രാജ്യത്ത് വളര്ന്നതെന്ന് ലുലു ഗ്രൂപ്പ് ചെയര്മാന് എം.എ.യൂസഫലി. ക്ഷേത്രങ്ങളും പള്ളികളും ചര്ച്ചുകളും തൊട്ടുരുമ്മി നില്ക്കുന്നത് ഈ സൗഹൃദത്തിന്റെ ബാക്കിപത്രങ്ങളാണ്. ദേശീയപാതയോരത്ത് അറേബ്യന് മാതൃകയില് പുനര്നിര്മ്മിച്ച നെട്ടൂര് മസ്ജിദുല് ഹിമായയുടെ ഉദ്ഘാടനം നിര്വഹിക്കുകയായിരുന്നു അദ്ദേഹം.
‘പരസ്പര ബഹുമാനത്തില് അധിഷ്ടിതമായിരിക്കണം വിവിധ മത വിഭാഗങ്ങളിലുള്ളവര് ‘ സഹവര്ത്തിത്വവും സാഹോദര്യവും ഈ കാലഘട്ടത്തിന്റെ ആവശ്യകയാണ് . ഇസ്ലാം സാഹോദര്യത്തിന്റെയും സ്നേഹത്തിന്റെയും കരുതലിന്റെയും മതമാണ്. ഇസ്ലാമിന്റെ ഈ വിശാലമായ കാഴ്ചപ്പാടാണ് യു.എ.ഇ ഉള്പ്പെടെയുള്ള ഗള്ഫ് ഭരണാധികാരികള് പിന്തുടരുന്നത്. എല്ലാ മതസ്ഥരെയും സ്വീകരിച്ച് പാരമ്പര്യമുള്ള മഹത്തായ രാജ്യമാണ് നമ്മുടെത്.’ എം.എ.യൂസഫലി പറഞ്ഞു.
ചടങ്ങില് മസ്ജിദുല് ഹിമായ പ്രസിഡന്റ് പി.കെ. അബ്ദുള് മജീദ് അധ്യക്ഷത വഹിച്ചു. മുന് മന്ത്രി കെ.ബാബു, കെ.ബി.മുഹമ്മദ്കുട്ടി മാസ്റ്റര്, മസ്ജിദുല് ഹിമായ സെക്രട്ടറി സി. എ. ഷംസുദ്ധീന്, വൈസ് പ്രസിഡന്റ് എം.എ.നൗഷാദ് എന്നിവര് പ്രസംഗിച്ചു. ഖത്തീബ് അഫ്സല് മാഫി ദുആയും സുഹൈല് ഭാരിമി ഖിര്അത്തും നിര്വഹിച്ചു.
എം.എ.യൂസഫലിയുടെ പത്നി സാബിറ യൂസഫലി തന്റെ മാതാവിന്റെ പേരില് പുനര്നിര്മ്മിച്ചതാണ് പള്ളി. മൂന്ന് നിലകളിലായി 16,000 സ്ക്വയര് ഫീറ്റിലാണ് പളളിയുടെ നിര്മ്മാണം. താഴെത്തെ നിലയില് ശീതികരിച്ചിട്ടുള്ള പള്ളിയില് മൂന്നുനിലകളിലുമായി 1800പേര്ക്ക് ഒരേ സമയം പ്രാര്ത്ഥിക്കാം. യാത്രക്കാരായ സ്ത്രീകള്ക്ക് പ്രാര്ത്ഥനയ്ക്കു പ്രത്യേക സൗകര്യവും ഇതോടൊപ്പം ഒരുക്കിയിട്ടുണ്ട്.
