തിരുവനന്തപുരം: എംപി വീരേന്ദ്രകുമാറിന്റെ നിര്യാണത്തെ തുടര്‍ന്ന് ഒഴിവുവന്ന രാജ്യസഭാ സീറ്റിലേക്ക് നടക്കുന്ന ഉപതിരഞ്ഞെടുപ്പില്‍ എല്‍ഡിഎഫ് സ്ഥാനാര്‍ഥിയായി എല്‍ജെഡി സംസ്ഥാന അധ്യക്ഷന്‍ എം വി ശ്രേയാംസ്കുമാര്‍ നാമനിര്‍ദ്ദേശ പത്രിക സമര്‍പ്പിച്ചു. കോവിഡ് സുരക്ഷാ മാനദണ്ഡങ്ങള്‍ പാലിച്ചാണ് പത്രിക സമര്‍പ്പണം നടന്നത്. മന്ത്രിമാരായ രാമചന്ദ്രന്‍ കടന്നപ്പള്ളി, കെ കൃഷ്ണന്‍കുട്ടി, സി ദിവാകരന്‍ എംഎല്‍എ, എല്‍ഡിഎഫ് കണ്‍വീനര്‍ എ വിജയരാഘവന്‍ എന്നിവര്‍ സംബന്ധിച്ചു.
രാവിലെ 11.30ന് റിട്ടേണിംഗ് ഓഫീസര്‍ കൂടിയായ നിയമസഭാ സെക്രട്ടറി മുമ്പാകെയാണ് പത്രിക സമര്‍പ്പിച്ചത്. മുഖ്യ തിരഞ്ഞെടുപ്പ് ഓഫീസര്‍ ടിക്കാറാം മീണയും സംബന്ധിച്ചു. നാമനിര്‍ദ്ദേശ പത്രികയും കെട്ടി വയ്ക്കുന്ന തുകയും ഉള്‍പ്പെടെ യുവി സ്കാന്‍ ചെയ്ത ശേഷമാണ് സ്വീകരിച്ചത്. റിട്ടേണിംഗ് ഓഫീസറുടെ ചേംബറും പരിസരവും രാവിലെ തന്നെ അണു നശീകരണം നടത്തിയിരുന്നു.
പരിസ്ഥിതി വിഷയങ്ങള്‍ ഉള്‍പ്പടെ പാര്‍ലമെന്റില്‍ ശക്തമായ നിലപാട് സ്വീകരിക്കുമെന്ന് പത്രികാസമര്‍പ്പണത്തിന് ശേഷം അദ്ദേഹം മാധ്യമങ്ങളോട് പറഞ്ഞു. ഇടത് സോഷ്യലിസ്റ്റ് ആശയങ്ങള്‍ ഉയര്‍ത്തിപ്പിടിക്കും. കേരളത്തിന്റെ താല്‍പര്യങ്ങള്‍ സംരക്ഷിക്കും. ശക്തമായ മതേതര നിലപാട് സ്വീകരിക്കുമെന്നും അദ്ദേഹം പറഞ്ഞു.
