തദ്ദേശ തെരഞ്ഞെടുപ്പില്‍ താരങ്ങളും വോട്ട് ചെയ്യാനെത്തി. തൃശൂര്‍ പുള്ള് എ.എല്‍.പി സ്‌കൂളിലാണ് മഞ്ജു വാര്യര്‍ വോട്ട് ചെയ്യാനെത്തിയത്. അമ്മയ്‌ക്കൊപ്പം രാവിലെ തന്നെ ബൂത്തിലെത്തിയെങ്കിലും തിരിച്ചറിയല്‍ കാര്‍ഡ് എടുക്കാന്‍ മറന്നു. പിന്നീട് വീണ്ടും വീട്ടിലേക്ക് കാര്‍ഡ് എടുത്ത ശേഷം വോട്ട് ചെയ്യുകയായിരുന്നു.
അതേസമയം, വോട്ടര്‍ പട്ടികയില്‍ പേരില്ലാത്തതിനാല്‍ നടന്‍ മമ്മൂട്ടിക്ക് വോട്ട് ചെയ്യാനായില്ല. പനമ്പിള്ളി നഗര്‍ സ്‌കൂളിലാണ് മമ്മൂട്ടി സാധാരണ വോട്ട് ചെയ്യാറുള്ളത്. എന്നാല്‍ ലോക്ക് ഡൗണ്‍ കാലത്ത് മമ്മൂട്ടി കടവന്ത്രയിലെ പുതിയ വീട്ടിലേക്ക് താമസം മാറ്റിയിരുന്നു. ഇതോടെ മമ്മൂട്ടിയുടെ പേര് വോട്ടര്‍പട്ടികയില്‍ നിന്ന് ഒഴിവാക്കുകയായിരുന്നു. പുതിയ വാര്‍ഡില്‍ പേര് ചേര്‍ത്തതുമില്ല. ഇന്നലെ വോട്ടര്‍ പട്ടിക പരിശോധിച്ചപ്പോഴാണ് പട്ടികയില്‍ പേരില്ല എന്ന വിവരം അറിഞ്ഞത്. ഭാര്യ സുല്‍ഫത്തും ദുല്‍ഖറും ഭാര്യ അമാല്‍ സൂഫിയയും മകള്‍ മറിയവും ഇവിടെയാണ് ഇപ്പോള്‍ താമസം. ചെന്നൈയില്‍ ആയതിനാല്‍ മകനും നടനുമായ ദുല്‍ഖറും വോട്ട് ചെയ്തില്ല. എറണാകുളം ജില്ലാ കളക്ടര്‍ എസ്. സുഹാസിനും പട്ടികയില്‍ പേരില്ലാത്തതിനാല്‍ വോട്ട് ചെയ്യാനായില്ല.
സിനിമാ താരവും മുന്‍ എം.പിയുമായ ഇന്നസെന്റ് ഇരിങ്ങാലക്കുട സെന്റ് മേരീസ് ഹയര്‍ സെക്കന്‍ഡറി സ്‌കൂളിലെ ബൂത്തില്‍ വോട്ട് രേഖപ്പെടുത്തി. കള സിനിമയുടെ കൂത്താട്ട്കുളത്തെ ലൊക്കേഷനില്‍ നിന്നാണ് ടൊവിനോ തോമസ് അച്ഛന്‍ തോമസിനൊപ്പം വോട്ട് ചെയ്യാനെത്തിയത്. ജനാധിപത്യത്തോടുളള ആദരവാണ് ഓരോ വോട്ടും എന്ന് പറഞ്ഞ ടൊവിനോ ഡല്‍ഹിയിലെ കര്‍ഷക സമരത്തിനുളള പിന്തുണയും വ്യക്തമാക്കി. കര്‍ഷകര്‍ ഉന്നയിക്കുന്ന വിഷയങ്ങള്‍ ന്യായമാണെന്ന് ടൊവിനോ പറഞ്ഞു. അന്തിക്കാട് ജിഎല്‍പി സ്‌കൂളിലാണ് സംവിധായകന്‍ സത്യന്‍ അന്തിക്കാട് വോട്ട് ചെയ്യാനെത്തിയത്.
ഹൈബി ഈഡന്‍ എം.പി കുടുംബസമേതം എറണാകുളം മാമംഗലം എസ്.എന്‍.ഡി.പി ഹാളില്‍ രാവിലെ 7.30 ന് വോട്ട് ചെയ്തു.സി.പി.എം സെക്രട്ടറി എ.വിജയരാഘവന്‍, മന്ത്രിമാരായ സി.രവീന്ദ്രനാഥ്, വി.എസ്. സുനില്‍ കുമാര്‍ എന്നിവരും രാവിലെ വോട്ട് ചെയ്തു. എ.വിജയ രാഘവനും മന്ത്രി രവീന്ദ്രനാഥും ന് തൃശൂര്‍ കേരളവര്‍മ്മ കോളേജില്‍ വോട്ട് രേഖപ്പെടുത്തി. മന്ത്രി വി.എസ്. സുനില്‍കുമാര്‍ അന്തിക്കാട് ഗ്രാമപഞ്ചായത്തിലെ 11ാം വാര്‍ഡിലെ മുറ്റിച്ചൂര്‍ എല്‍.പി സ്‌കൂളില്‍ വോട്ട് ചെയ്തു.
ബി.ജെ.പി സംസ്ഥാന വൈസ് പ്രസിഡന്റ് ഡോ.കെ.എസ്. രാധാകൃഷ്ണന്‍ ചിറ്റൂര്‍ അനന്തമാര്‍ഗ് ഹൈസ്‌കൂളിലും ജില്ലാ പ്രസിഡന്റ് എസ്. ജയകൃഷ്ണന്‍ പറവൂര്‍ മന്നം പാറപ്പുറം മദ്രസയിലും വോട്ട് ചെയ്തു. സി.പി.എം സംസ്ഥാന നേതാവ് പി. രാജീവ് കളമശേരി സെന്റ് പോള്‍സ് കോളേജില്‍ വോട്ട് ചെയ്തു. എറണാകുളം സെന്റ് മേരീസ് സ്‌കൂളിലാണ് ക്രൈസ്തസഭാ തലവന്മാര്‍ വോട്ട് ചെയ്തത്. സീറോ മലബാര്‍ സഭാ തലവന്‍ കര്‍ദ്ദിനാള്‍ ജോര്‍ജ് ആലഞ്ചേരി, എറണാകുളം അങ്കമാലി മെത്രാപ്പോലീത്തന്‍ വികാരി ആന്റണി കരിയില്‍, വരാപ്പുഴ അതിരൂപതാ മെത്രാപ്പൊലീത്ത ഡോ. ജോസഫ് കളത്തിപ്പറമ്ബില്‍ എന്നിവര്‍ സെന്റ് മേരീസില്‍ വോട്ട് ചെയ്തു. കൊവിഡ് ബാധിതരായ മുന്‍കേന്ദ്രമന്ത്രി കെ.വി. തോമസും ബെന്നി ബഹനാന്‍ എം.പിയും തപാല്‍ വോട്ട് കഴിഞ്ഞ ദിവസം ചെയ്തിരുന്നു.
