തിരുവനന്തപുരം: പോലീസ് നിയമഭേദഗതി നടപ്പിലാക്കാന്‍ മാര്‍ഗനിര്‍ദേശം കൊണ്ടുവരുമെന്ന് ഡിജിപി ലോക്‌നാഥ് ബെഹ്‌റ. നിയമവിദഗ്ധരുമായി കൂടിയാലോചിച്ചാകും നടപടിക്രമം നിശ്ചയിക്കുന്നത്. ദുരുപയോഗം തടയാനാണ് നടപടിയെന്നും ലോക്‌നാഥ് ബെഹ്‌റ പറഞ്ഞു.
അതേസമയം, പോലീസ് നിയമഭേദഗതിയില്‍ ആശങ്കയ്ക്ക് അടിസ്ഥാനമില്ലെന്ന് മുഖ്യമന്ത്രി പിണറായി വിജയന്‍ പറഞ്ഞു. ഏതെങ്കിലും വിധത്തില്‍ സ്വതന്ത്രമായ അഭിപ്രായ സ്വാതന്ത്ര്യത്തിനോ നിഷ്പക്ഷമായ മാധ്യമപ്രവര്‍ത്തനത്തിനോ എതിരല്ല. മാധ്യമ സ്വാതന്ത്ര്യത്തിനൊപ്പം വ്യക്തിസ്വാതന്ത്ര്യം, ഭരണഘടന ഉറപ്പുനല്‍കുന്ന അന്തസ്സ് എന്നിവ സംരക്ഷിക്കുവാനും ചുമതലയുണ്ട്.
നീചമായ സൈബര്‍ ആക്രമണം മാധ്യമപ്രവര്‍ത്തനത്തിന്റെ മറവില്‍ നടക്കുന്നു. വ്യക്തിഗത ചാനലുകള്‍ക്കെതിരെ പ്രമുഖരടക്കം പരാതി നല്‍കിയിട്ടുണ്ട്. മാധ്യമസ്വാതന്ത്ര്യത്തിന് സര്‍ക്കാര്‍ ബാധ്യസ്ഥമാണെന്നും മുഖ്യമന്ത്രി പറഞ്ഞു.
