വയനാട്: വയനാട്ടില് മാവോയിസ്റ്റ് ഭീഷണിയുള്ള പോളിങ് ബൂത്തുകളില് സുരക്ഷ ശക്തമാക്കുമെന്ന് ജില്ലാ ഭരണകൂടം. അടുത്തിടെ നടന്ന മാവോയിസ്റ്റ് ഏറ്റുമുട്ടല് കൂടെ കണക്കിലെടുത്താണ് കൂടുതല് സേനകളെ വിന്യസിപ്പിക്കാന് തീരുമാനം.
മൂന്ന് താലൂക്കുകളിലായി മാവോയിസ്റ്റ് ഭീഷണിയുള്ള 112 പോളിങ് ബൂത്തുകളാണ് വയനാട് ജില്ലയില് ഉള്ളത്. വെബ് കാസ്റ്റിങ് ഏര്പ്പെടുത്തി ഈ ബൂത്തുകളെ നിരീക്ഷിക്കും. തണ്ടര് ബോള്ട്ട് സേനയെ നിരീക്ഷണത്തിന് നിയോഗിക്കുന്നുണ്ട്. വാഹന പരിശോധനയും കര്ശനമാക്കും.
അടുത്തിടെ ബാണാസുര മലയിലെ ഏറ്റുമുട്ടലില് മാവോയിസ്റ്റ് വേല്മുരുഗന് കൊല്ലപ്പെട്ടതും കഴിഞ്ഞ ഫെബ്രുവരിയില് വൈത്തിരിയിലെ റിസോര്ട്ടിലുണ്ടായ ഏറ്റുമുട്ടലില് സി.പി ജലീല് കൊല്ലപ്പെട്ടതും കണക്കിലെടുത്താണ് സുരക്ഷ വര്ധിപ്പിക്കാന് തീരുമാനിച്ചത്.
