മസ്കറ്റ്: കവൈറ്റില്‍ റെസിഡന്‍സി കാലാവധി കഴിഞ്ഞവരോട് ഉടന്‍ രാജ്യം വിടാന്‍ നിര്‍ദേശം നല്‍കി അധികൃതര്‍. 2020 ജനുവരി ഒന്നിനും അതിന് മുമ്പുമായി റെസിഡന്‍സ് കാലാവധി തീര്‍ന്ന പ്രവാസികളോടാണ് രാജ്യം വിടാന്‍ നിര്‍ദേശം നല്‍കിയത്. ഏകദേശം 130000 പേര്‍ അനധികൃത താമസക്കാരായി കുവൈറ്റിലുണ്ടെന്നാണ് അധികൃതരുടെ കണക്ക്. അനുവദിച്ചിരുന്ന കാലയളവിനുള്ളില്‍ പിഴയടച്ച് റെസിഡന്‍സി പുതുക്കണമെന്നാണ് മുന്നറിയിപ്പ്.
എന്നാല്‍ നിയമവിധേയമാക്കി നിയമനടപടികളില്‍ നിന്ന് ഒഴിവാകാമെന്ന് ഡെപ്യൂട്ടി പ്രധാനമന്ത്രി അനസ് അല്‍ സലെ മുന്നറിയിപ്പ് നല്‍കി. നിയമലംഘകരെ കണ്ടുപിടിച്ച് നാടുകടത്തുന്നതിന് മുമ്പായി അഭ്യന്തര മന്ത്രാലയം അനുവദിച്ചിരിക്കുന്ന അവസാനത്തെ ഇളവാണ് ഇതെന്നും അറിയിച്ചു. തുടര്‍ന്ന് രാജ്യത്തുള്ള അനധികൃത താമസക്കാരെ നാടു കടത്തുന്നതിനോടൊപ്പം തിരിച്ച് കുവൈറ്റിലേക്ക് വരാനാകാത്ത വിധം കരിമ്പട്ടികയില്‍ പെടുത്തുമെന്നും അധികൃതര്‍ മുന്നറിയിപ്പ് നല്‍കുന്നു.
അതേസമയം, വിസിറ്റ് വിസയിലുള്ളവരുടെ വിസ കാലാവധി നവംബര്‍ 30 ന് അവസാനിക്കും. 30 ന് അര്‍ധരാത്രി 12 ന് മുമ്പായി അവര്‍ പുറപ്പെടണമെന്ന് നിര്‍ദേശിച്ചു. ഇതിന് ശേഷം പോകുന്നവര്‍ക്ക് പ്രതിദിനം 2 കെ.ഡി പിഴ നല്‍കേണ്ടി വരും. ലോക്ഡൗണ്‍ സമയത്ത് വിസിറ്റ് വിസാ കാലാവധി ഒന്നിലധികം നീട്ടിയ പശ്ചാത്തലത്തില്‍ ഇനി കാലാവധി നീട്ടി നല്‍കാന്‍ സാധ്യതയില്ലെന്നാണ് റിപ്പോര്‍ട്ട്.
