കൊല്ലം: കൊല്ലം കൊട്ടാരക്കര ഡിപ്പോയില്‍ നിന്ന് കെ.എസ്.ആര്‍.ടി.സി ബസ് മോഷ്ടിച്ച് കടത്തിയതായി പരാതി. ഡിപ്പോയ്ക്ക് സമീപം കൊട്ടാരക്കര മുനിസിപ്പാലിറ്റി ഓഫീസിന് മുന്നില്‍ നിന്നാണ് കെഎല്‍ 15, 7508 നമ്പര്‍ വേണാട് ബസ് മോഷണം പോയത്. ഡിപ്പോ അധികൃതര്‍ കൊട്ടാരക്കര പോലീസിന് പരാതി നല്‍കി.
ഇന്നലെ രാത്രി ഗാരേജില്‍ സര്‍വീസിന് വേണ്ടി കയറ്റിയ വണ്ടിയാണിത്. പുലര്‍ച്ചെ 12.30 യോടെ സര്‍വീസ് പൂര്‍ത്തിയാക്കി മുനിസിപ്പാലിറ്റി ഓഫീസിന് സമീപം പാര്‍ക്ക് ചെയ്തിരുന്നു. രാവിലെ വണ്ടിയെടുക്കാന്‍ ഡ്രൈവര്‍ എത്തിയ്‌പോള്‍ വണ്ടിയില്ല. ഏതെങ്കിലും ഡ്രൈവര്‍ വണ്ടി മാറിയെടുത്ത് പോയതാകാമെന്ന ധാരണയില്‍, ഡിപ്പോയില്‍ നിന്ന് പോയ മുഴുവന്‍ ഡ്രൈവര്‍മാരെയും ബന്ധപ്പെട്ടു. എന്നാല്‍ ആരുടെ പക്കലും വണ്ടി ഉണ്ടായിരുന്നില്ല.
വിചിത്രമായ മോഷണത്തിനു പിന്നിലെ മോഷ്ടവിനെ കണ്ടെത്താനുള്ള അന്വേഷണത്തിലാണ് പോലിസ്. റോഡരികില്‍ നിര്‍ത്തിയിട്ടിരുന്ന വണ്ടി ആരെങ്കിലും എടുത്തുകൊണ്ട് പോയതാകാമെന്ന നിഗമനത്തിലാണ് അന്വേഷണ സംഘം. കെ.എസ്.ആര്‍.ടി.സി ബസായതിനാല്‍ അധിക ദൂരമൊന്നും പോകാനാവില്ലെന്ന പ്രതീക്ഷയിലാണ് പോലീസ്. എവിടെയെങ്കിലും ഉപേക്ഷിക്കാനാണ് സാധ്യതയെന്നും കരുതുന്നുണ്ട്. സംഭവത്തില്‍ കൊട്ടാരക്കര പോലീസിന്റെ അന്വേഷണം പുരോഗമിക്കുകയാണ്.
