കൊച്ചി: കൊച്ചി മെട്രോ ട്രെയിനില്‍ യാത്രാ നിരക്ക് കുറച്ചു. കൂടിയ നിരക്ക് 60 രൂപയായിരുന്നത് കുറച്ച് 50 രൂപയാക്കി. കൊച്ചി വണ്‍ കാര്‍ഡ് ഉപയോഗിക്കുന്നവര്‍ക്ക് പത്ത് ശതമാനം കൂടി ഇളവും ലഭിക്കും. തിങ്കളാഴ്ച്ച സര്‍വീസുകള്‍ പുനരാരംഭിക്കെയാണ് മെട്രോ നിരക്കില്‍ മാറ്റംവരുത്തിയത്.
കോവിഡ് മാനദണ്ഡങ്ങള്‍ പാലിച്ചായിരിക്കും മെട്രോയുടെ പ്രവര്‍ത്തനം. സാമൂഹിക അകലം പാലിക്കുന്ന തരത്തില്‍ യാത്രക്കാര്‍ക്ക് ഇരിക്കാനുള്ള ക്രമീകരണം ഒരുക്കിയിട്ടുണ്ട്. ട്രെയിനിന്റെ വാതില്‍ സ്റ്റേഷനുകളില്‍ 20 സെക്കന്‍ഡ് തുറന്നിടും. ട്രെയിനിലെ വായുസഞ്ചാരം മെച്ചപ്പെടുത്താനും ആളുകള്‍ക്കു തിരക്കുണ്ടാക്കാതെ കയറാനും ഇറങ്ങാനും വേണ്ടിയാണിത്. കൂടാതെ തൈക്കൂടം, ആലുവ സ്റ്റേഷനുകളില്‍ ഓരോ യാത്രയ്ക്ക് ശേഷവും ട്രെയിനിന്റെ എല്ലാ വാതിലുകളും 5 മിനിറ്റ് തുറന്നിടും.
സര്‍വീസ് ആരംഭിക്കുന്ന ആദ്യത്തെ രണ്ട് ദിവസങ്ങളില്‍ (7, 8) മെട്രോയ്ക്ക് ഉച്ചയ്ക്ക് അവധിയായിരിക്കും. ഉച്ചയ്ക്ക് ഒരു മണി മുതല്‍ രണ്ട് വരെയാവും സര്‍വീസ്. കൂടാതെ ഇതേ ദിവസങ്ങള്‍ രാത്രി എട്ടിന് സര്‍വീസ് അവസാനിക്കുകയും ചെയ്യും.യാത്രക്കാരുടെ തിരക്ക് അനുസരിച്ചായിരിക്കും പഴയ രീതിയില്‍ സര്‍വീസ് നടത്തണമോ എന്ന് തീരുമാനിക്കുക. 7,8 ദിവസങ്ങളില്‍ രാവിലെ 7 മുതല്‍ ഉച്ചയ്ക്ക് 12 വരെയും ഉച്ചയ്ക്ക് 2മുതല്‍ രാത്രി 9 വരെയും 10 മിനിറ്റ് ഇടവേളയില്‍ സര്‍വീസുണ്ടാകും. ഉച്ചയ്ക്ക് 12 മുതല്‍ 2വരെയുള്ള സമയത്ത് 20 മിനിറ്റ് ഇടവിട്ടായിരിക്കും സര്‍വീസ്.
തുടര്‍ന്നുള്ള ദിവസങ്ങളില്‍ സര്‍വീസ് രാവിലെ 7 മുതല്‍ രാത്രി 9 വരെയായിരിക്കും. അവസാന ട്രെയിന്‍ ആലുവ, തൈക്കൂടം സ്റ്റേഷനുകളില്‍ നിന്നു രാത്രി 9നു പുറപ്പെടും. 10 മിനിറ്റ് ഇടവേളയില്‍ സര്‍വീസ്. ഞായറാഴ്ച സര്‍വീസ് രാവിലെ 8 മുതല്‍ മാത്രം.
