കൊച്ചി: കൊച്ചി-മംഗളുരു ഗെയില്‍ പ്രകൃതി വാതക പൈപ്പ് ലൈന്‍ ഇന്ന് പ്രധാനമന്ത്രി നരേന്ദ്ര മോദി രാജ്യത്തിന് ഇന്ന് സമര്‍പ്പിക്കും. സ്ഥലമേറ്റെടുപ്പില്‍ മുടങ്ങി കിടന്ന പദ്ധതിയാണ് ഇന്ന് യാഥാര്‍ത്ഥ്യമാകുന്നത്. വീഡിയോ കോണ്‍ഫറന്‍സിങ്ങ് വഴിയാണ് പ്രധാനമന്ത്രി ഉദ്ഘാടനം നിര്‍വഹിക്കുന്നത്. കൊച്ചിയില്‍ നിന്ന് തൃശൂര്‍ വഴി പാലക്കാട് കുറ്റനാട് വരെയുള്ള പൈപ്പ് ലൈന്‍ 2019 ജൂണിലാണ് കമ്മീഷന്‍ ചെയ്തിരുന്നത്.
പൈപ്പ് ലൈന്‍ വഴി വീടുകളിലേക്കുളള പ്രകൃതി വാതക വിതരണത്തിന് ഗെയില്‍ വഴിയൊരുക്കും. കുടിവെള്ളം പൈപ്പ് ലൈന്‍ വഴി വീട്ടിലെത്തുന്നത് പോലെ 24 മണിക്കൂറും പ്രകൃതി വാതകവും പൈപ്പ് ലൈന്‍ വഴി വീടുകളിലേക്കെത്തും. 450 കിലോമീറ്റര്‍ ദൈര്‍ഘ്യമുള്ള പൈപ്പ് ലൈന്‍ കൊച്ചിയിലെ എല്‍എന്‍ജി റീ ഗ്യാസിഫിക്കേഷന്‍ ടെര്‍മിനലില്‍ നിന്ന് വാതകം മംഗലാപുരത്തെത്തിക്കും. 3000 കോടി രൂപ ചെലവ് വരുന്ന പദ്ധതി പരിസ്ഥിതി സൗഹൃദമാണ്. ഒപ്പം കുറഞ്ഞ ചെലവില്‍ പ്രകൃതി വാതകം വീടുകള്‍ക്കും, വ്യവസായങ്ങള്‍ക്കും എത്തിക്കുകയും ചെയ്യുന്നതാണ് ഗെയ്ല്‍ പൈപ്പ് ലൈന്‍. പ്രകൃതിവാതക പൈപ്പ് ലൈന്‍ പൂര്‍ത്തിയായതോടെ സംസ്ഥാനത്തിന്റെ വ്യാവസായിക വളര്‍ച്ചക്കും അതുവഴി സാമ്പത്തിക വികസനത്തിനും വലിയ സാധ്യതയാണ് തുറന്നിരിക്കുന്നത്.
