ജമ്മുകശ്മീരില്‍ നിയന്ത്രണ രേഖയ്ക്ക് സമീപം സുരക്ഷാ സേനയുടെ വെടിയേറ്റ് രണ്ട് ഭീകരര്‍ കൊല്ലപ്പെട്ടു. നിയന്ത്രണ രേഖയില്‍ നിന്ന് 100 മീറ്റര്‍ അകലെ ഇന്ന് പുലര്‍ച്ചെയുണ്ടായ ഏറ്റുമുട്ടലിലാണ് ഭീകരരെ വധിച്ചത്. കശ്മീര്‍ ജില്ലയിലെ കുപ്വാര ജില്ലയിലേക്ക് പ്രവേശിച്ച രണ്ട് ഭീകരരെയാണ് സേന വെടിവെച്ചതെന്ന് മുതിര്‍ന്ന സൈനിക ഉദ്യോഗസ്ഥന്‍ പറഞ്ഞു.
കൊല്ലപ്പെട്ട ഭീകരരില്‍ നിന്നും എകെ 47, നൂറു കണക്കിന് തിരകള്‍, ചൈനയില്‍ നിര്‍മ്മിച്ച പിസ്റ്റള്‍, ഓസ്ട്രലിയന്‍ സാങ്കേതിക വിദ്യയില്‍ നിര്‍മ്മിച്ച നാല് ഗ്രനേഡുകള്‍ എന്നിങ്ങനെ വന്‍ തോതിലുളള ആയുധശേഖരവും പിടികൂടി. ഗ്രനേഡുകള്‍ പാകിസ്ഥാനിലെ ഫാക്ടറിയില്‍ നിര്‍മ്മിച്ചവയാണെന്നാണ് സൂചന. 2001 ല്‍ പാര്‍ലമെന്റ് ആക്രമിച്ച ജയ്‌ഷെ മുഹമ്മദ് ഭീകരരില്‍ നിന്നും ഇത്തരം ഗ്രനേഡുകള്‍ പിടിച്ചെടുത്തിരുന്നു.
