തിരുവനന്തപുരം: ബംഗാളില്‍ രൂപീകരിച്ച സിപിഎം-കോണ്‍ഗ്രസ് സഖ്യം കേരളത്തിലും വ്യാപിക്കുന്നുവെന്ന് ബിജെപി സംസ്ഥന അധ്യക്ഷന്‍ കെ.സുരേന്ദ്രന്‍. ദേശിയതലത്തില്‍ നിലനില്‍പ് നഷ്ടപ്പെട്ട സിപിഎമ്മും കോണ്‍ഗ്രസും പിടിച്ചുനില്‍ക്കാന്‍ ഏതറ്റംവരെയും പോകും എന്നതിന് ഉദാഹരണമാണ് സി.പി.എം പൊളിറ്റ്ബ്യൂറോയുടെ അനുമതിയോടെ ബംഗാളില്‍ രൂപീകരിച്ച പരസ്യ സഖ്യമെന്ന് സുരേന്ദ്രന്‍ പ്രസ്താവനയില്‍ പറയുന്നു.
തദ്ദേശ സ്വയംഭരണ തെരഞ്ഞെടുപ്പില്‍ ബിജെപിയെ തോല്‍പ്പിക്കാന്‍ സിപിഎം-കോണ്‍ഗ്രസ് സഖ്യ ചര്‍ച്ചകള്‍ തുടങ്ങിക്കഴിഞ്ഞതായും കേരളത്തിലെ ബിജെപിയുടെ വളര്‍ച്ച മനസിലാക്കിയാണ് ഈ നീക്കമെന്നും സുരേന്ദ്രന്‍ പറഞ്ഞു. മഞ്ചേശ്വരം, വട്ടിയൂര്‍ക്കാവ് മോഡല്‍ സംസ്ഥാന വ്യാപകമാക്കാനാണ് ശ്രമം. തീവ്രവാദ സംഘടനകളായ ജമാഅത്തെ ഇസ്ലാമി, എസ്.ഡി.പി.ഐ സംഘടനകളെ മുസ്ലിംലീഗ് ഒപ്പം കൂട്ടുന്നതും ബിജെപി വിരോധത്തിന്റെ പേരിലാണെന്ന് സുരേന്ദ്രന്‍ ആരോപിച്ചു.
അതേസമയം ആര്‍.എസ്.എസ് ബന്ധത്തിന്റെ പേരില്‍ കോടിയേരിയും ചെന്നിത്തലയും പരസ്പരം ആരോപണം ഉന്നയിക്കുന്നത് ന്യൂനപക്ഷ വേട്ട് ലക്ഷ്യമിട്ടാണെന്നും സുരേന്ദ്രന്‍ ആരോപിച്ചു. രമേശ് ചെന്നിത്തലയ്‌ക്കെതിരായ വിജിലന്‍സ് അന്വേഷണം അട്ടിമറിച്ചത് ഇടത് സര്‍ക്കാരിന്റെ കാലത്താണെന്നും ചെന്നിത്തലയ്ക്ക് എല്ലാകാലത്തും രക്ഷകരായത് സിപിഎം സര്‍ക്കാരുകളാണെന്നും സുരേന്ദ്രന്‍ പറഞ്ഞു.
ടി.പി വധക്കേസില്‍ സിപിഎമ്മിന്റെ ഉന്നതര്‍ രക്ഷപ്പെട്ടത് ചെന്നിത്തല ആഭ്യന്ത്രമന്ത്രി ആയിരുന്നതുകൊണ്ടാണെന്ന് പറഞ്ഞ സുരേന്ദ്രന്‍ കോടിയേരി കണ്ണടച്ച് പാലുകുടിച്ചാല്‍ സത്യം ആരും അറിയില്ലെന്ന് ധരിക്കരുതെന്നും പരിഹസിച്ചു.
