തിരുവനന്തപുരം: നെയ്യാറ്റിന്‍കരയില്‍ ആത്മഹത്യ ചെയ്ത രാജന്റെയും അമ്പിളിയുടേയും കുട്ടികളുടെ വിദ്യാഭ്യാസം സാമൂഹ്യനീതി വകുപ്പ് പൂര്‍ണമായും ഏറ്റെടുത്തതായി മന്ത്രി കെ. കെ ശൈലജ. നെയ്യാറ്റിന്‍കരയിലെ വീട്ടില്‍ കുട്ടികളെ സന്ദര്‍ശിച്ചതിന് ശേഷമാണ് മന്ത്രി ഇക്കാര്യം അറിയിച്ചത്.
മൂത്തമകനെ കണ്ട് കാര്യങ്ങള്‍ അന്വേഷിച്ചതായും ഇളയകുട്ടിയ്ക്ക് ചില പ്രയാസങ്ങളുള്ളതിനാല്‍ ആശുപത്രിയിലാണെന്നും കുട്ടിയുടെ ചികിത്സ പൂര്‍ണമായും സര്‍ക്കാര്‍ നിര്‍വഹിക്കുന്നതാണെന്നും മന്ത്രി അറിയിച്ചു. കുട്ടിക്ക് വേറെ പ്രശ്നങ്ങളില്ലെന്നാണ് അറിഞ്ഞതെങ്കിലും ഇനി മെഡിക്കല്‍ കോളേജില്‍ ചികിത്സ ആവശ്യമെങ്കില്‍ അതും ചെയ്തു കൊടുക്കുമെന്നും മന്ത്രി പറഞ്ഞു. കുടുംബത്തിന് ധനസഹായം നല്‍കാന്‍ മന്ത്രിസഭാ തീരുമാനെമടുത്തു. 10 ലക്ഷം രൂപ കുടുംബത്തിന് അനുവദിക്കും. കുട്ടികളുടെ സംരക്ഷണവും സര്‍ക്കാര്‍ ഏറ്റെടുക്കും. അതോടൊപ്പം തന്നെ ഈ മക്കളുടെ വേദനയ്ക്ക് ആശ്വാസമായി സര്‍ക്കാര്‍ എപ്പോഴും കൂടെയുണ്ടെന്നും മന്ത്രി അറിയിച്ചു.
