കേരളത്തിലെ ജനങ്ങള്‍ ഒന്നടങ്കം ഏറ്റുപാടിയ ‘കൈതോല പായവിരിച്ച്..’ എന്ന പാട്ടിന്റെ രചയിതാവ് ജിതേഷ് കക്കിടിപ്പുറം അന്തരിച്ചു. കരള്‍ സംബന്ധമായ അസുഖത്തെ തുടര്‍ന്നായിരുന്നു മരണം.
മലപ്പുറം ജില്ലയിലെ ആലങ്കോടാണ് ജിതേഷിന്റെ സ്വദേശം. പെയിന്റിങ് തൊഴിലാളിയായ ജിതേഷ് ആതിരമുത്തന്‍ എന്ന നാടന്‍പാട്ട് സംഘത്തില്‍ ചേരുകയായിരുന്നു. പാലം നല്ല നടപ്പാലം, വാനിന്‍ ചോട്ടിലെ…(നാടകം – ദിവ്യബലി ) തുടങ്ങിയ 600 -ഓളം പാട്ടുകളെഴുതിയിട്ടുണ്ട്. ‘കഥ പറയുന്ന താളിയോലകള്‍ ‘എന്ന നാടകം എഴുതുകയും ഗാനരചന, സംഗീതം, സംവിധാനം എന്നിവ നിര്‍വ്വഹിക്കുകയും ചെയ്തിട്ടുണ്ട്. മലയാളികള്‍ പാടിനടന്ന ‘കൈതോല പായവിരിച്ച്’ എന്ന ഗാനത്തിന്റെ രചയിതാവ് ജിതേഷ് ആണെന്ന് 26 വര്‍ഷങ്ങള്‍ക്ക് ശേഷമാണ് പുറത്തറിയുന്നത്. 1992-ല്‍ ബന്ധുവിന്റെ കുട്ടിയുടെ കാതുകുത്ത് നടക്കുമ്പോള്‍ സങ്കടമകറ്റാനായാണ് ഈ ഗാനമെഴുതിയതെന്ന് അദ്ദേഹം തന്നെ പറഞ്ഞിട്ടുണ്ട്.
പാട്ടെഴുത്തിനോടൊപ്പം കുട്ടികള്‍ക്ക് വേണ്ടി ലളിതഗാനങ്ങള്‍, ഏകാങ്ക നാടകങ്ങള്‍, പാട്ട് പഠിപ്പിക്കല്‍, ഉടുക്ക് കൊട്ട് പാട്ട് തുടങ്ങിയ മേഖലയിലും സജീവ സാന്നിദ്ധ്യമായിരുന്നു ജിതേഷ്.
