പാലക്കാട്: വാളയാറില്‍ രേഖകളില്ലാതെ കടത്തിയ സ്‌ഫോടക വസ്തുക്കള്‍ പിടികൂടി. മിനി ലോറിയില്‍ ഏഴായിരം ജലാറ്റിന്‍ സ്റ്റിക്കുകളും 7,500 ഡിറ്റണേറ്ററുകളുമാണ് കടത്താന്‍ ശ്രമിച്ചത്. സംഭവത്തില്‍ മിനിലോറിയില്‍ ഉണ്ടായിരുന്ന രണ്ട് തമിഴ്‌നാട് സ്വദേശികളെ പോലീസ് അറസ്റ്റ് ചെയ്തു.
ഈറോഡില്‍ നിന്ന് അങ്കമാലിയിലേക്ക് തക്കാളിയുമായി പോകുന്ന മിനിലോറിയിലായിരുന്നു രവി, പ്രഭു എന്നിവര്‍ സ്‌ഫോടക വസ്തുക്കള്‍ ഒളിപ്പിച്ചു കടത്താന്‍ ശ്രമിച്ചത്. 35 പെട്ടികളിലായിട്ടാണ് സ്‌ഫോടകവസ്തുക്കള്‍ ഒളിപ്പിച്ച് വച്ചിരുന്നത്. തക്കാളിപ്പെട്ടികള്‍ക്കിടയില്‍ വച്ച് കടത്താനായിരുന്നു ശ്രമം. പാലക്കാട് ഭാഗത്തെ ക്വാറികളില്‍ ഉപയോഗിക്കാനായി കൊണ്ട് വന്നതാണോ എന്ന് പോലീസ് സംശയിക്കുന്നുണ്ട്. സംഭവത്തില്‍ അന്വേഷണം പുരോഗമിക്കുകയാണ്.
