മലപ്പുറം: പാലാരിവട്ടം പാലം അഴിമതിക്കേസില്‍ മുന്‍ പൊതുമരാമത്ത് മന്ത്രി ഇബ്രാഹിം കുഞ്ഞ് അറസ്റ്റിലായതിന് പിന്നാലെ അടിയന്തര യോഗം ചേര്‍ന്ന് മുസ്ലീംലീഗ്. പി.കെ കുഞ്ഞാലിക്കുട്ടി, കെ.പി.കെ മജീദ് ഉള്‍പ്പടെയുള്ള നേതാക്കള്‍ മലപ്പുറത്ത് ചേര്‍ന്ന യോഗത്തില്‍ പങ്കെടുക്കുന്നുണ്ട്.
ഇന്ന് രാവിലെ പത്തരയോടെയാണ് ഇബ്രാഹിം കുഞ്ഞിനെ വിജിലന്‍സ് സംഘം അറസ്റ്റ് ചെയ്തത്. ഇബ്രാഹിം കുഞ്ഞിനെ അറസ്റ്റ് ചെയ്യാനായി അതിരാവിലെ തന്നെ വിജിലന്‍സ് സംഘം വീട്ടിലെത്തിയെങ്കിലും അദ്ദേഹം ആശുപത്രിയിലാണെന്ന് വീട്ടുകാര്‍ അറിയിച്ചു. തുടര്‍ന്ന് ലേക്ക്ഷോര്‍ ആശുപത്രിയില്‍ എത്തിയ വിജിലന്‍സ് അറസ്റ്റ് രേഖപ്പെടുത്തുകയായിരുന്നു.
ഇന്നലെ രാത്രിയാണ് ഇബ്രാഹിം കുഞ്ഞിനെ ആശുപത്രിയില്‍ പ്രവേശിപ്പിച്ചത്. ഇബ്രാഹിം കുഞ്ഞ് ആശുപത്രിയിലേക്ക് മാറിയത് അറസ്റ്റ് മുന്നില്‍ കണ്ടുകൊണ്ടാണെന്നാണ് സൂചന. അറസ്റ്റ് രേഖപ്പെടുത്തിയെങ്കിലും ഇബ്രാഹിം കുഞ്ഞ് ആശുപത്രിയില്‍ തന്നെ തുടരാണ് സാധ്യത. അദ്ദേഹത്തിന് ചികിത്സ ആവശ്യമാണെന്ന് ഡോക്ടര്‍മാര്‍ പറഞ്ഞതായാണ് വിവരം.
