ലകനൗ: ഹത്രാസില്‍ കൂട്ടബലാത്സംഗത്തിന് ഇരയായ പെണ്‍കുട്ടി മരിച്ച സംഭവത്തില്‍ മുഖ്യമന്ത്രി യോഗി ആദിത്യനാഥിനെതിരെ രൂക്ഷ വിമര്‍ശനവുമായി കോണ്‍ഗ്രസ് നേതാവ് പ്രിയങ്ക ഗാന്ധി. മുഖ്യമന്ത്രി സ്ഥാനത്ത് തുടരാന്‍ യോഗിക്ക് ധാര്‍മികമായ യാതൊരു അവകാശവുമില്ലെന്ന് പ്രിയങ്ക തുറന്നടിച്ചു. ട്വിറ്ററിലൂടെയാണ് പ്രിയങ്കയുടെ രൂക്ഷ വിമര്‍ശനം.
@myogiadityanath RESIGN
Instead of protecting the victim and her family, your government became complicit in depriving her of every single human right, even in death. You have no moral right to continue as Chief Minister. 3/3
— Priyanka Gandhi Vadra (@priyankagandhi) September 30, 2020
‘തന്നോട് ഫോണില്‍ സംസാരിച്ചുകൊണ്ടിരിക്കവെയാണ് മകള്‍ മരിച്ച വിവരം ഇരയുടെ പിതാവ് അറിയുന്നത്. അദ്ദേഹത്തിന്റെ ദയനീയമായ നിലവിളി താന്‍ ഫോണിലൂടെ കേള്‍ക്കുകയുണ്ടായി. മകള്‍ക്ക് നീതി ലഭിക്കണം എന്നത് മാത്രമാണ് തന്റെ ആവശ്യമെന്ന് തൊട്ടു മുന്‍പാണ് അദ്ദേഹം തന്നോട് പറഞ്ഞത്.’ – പ്രിയങ്ക ട്വീറ്റ് ചെയ്തു.
അവസാനമായി മകളെ വീട്ടിലേക്ക് കൊണ്ടുപോകാനും അവളുടെ അന്ത്യകര്‍മങ്ങള്‍ നടത്താനുമുള്ള അവസരം പോലും അദ്ദേഹത്തിന് നല്‍കിയില്ലെന്നും പ്രിയങ്ക ട്വിറ്ററില്‍ കുറിച്ചു. ഇരയെയും കുടുംബത്തെയും സംരക്ഷിക്കുന്നതിനു പകരം അവളുടെ ഒരോ മനുഷ്യാവകാശവും മരണത്തില്‍ പോലും നിഷേധിക്കുകയാണ് യു.പി സര്‍ക്കാര്‍ ചെയ്തതെന്ന് വിമര്‍ശിച്ച പ്രിയങ്ക, മുഖ്യമന്ത്രി യോഗി ആദിത്യനാഥിനോട് രാജിവയ്ക്കാനും ആവശ്യപ്പെട്ടു.
