ന്യൂഡല്‍ഹി: ഹത്രാസില്‍ പെണ്‍കുട്ടിയെ ക്രൂര ബലാത്സംഗത്തിന് ഇരയാക്കി കൊലപ്പെടുത്തിയ സംഭവത്തില്‍ രാജ്യവ്യാപക പ്രതിഷേധം കനക്കുകയാണ്. സംഭവത്തില്‍ കേന്ദ്ര സര്‍ക്കാര്‍ മൗനം പാലിക്കുകയാണെന്ന് കുറ്റപ്പെടുത്തി ഭീം ആര്‍മി നേതാവ് ചന്ദ്രശേഖര്‍ ആസാദ് ഇന്ത്യാഗേറ്റില്‍ എത്തും.
പെണ്‍കുട്ടി കൊല്ലപ്പെട്ട സംഭവത്തില്‍ പ്രധാനമന്ത്രി നരേന്ദ്ര മോദി മറുപടി നല്‍കണമെന്ന് ആവശ്യപ്പെട്ടാണ് പ്രതിഷേധം. സംഭവത്തില്‍ പ്രധാനമന്ത്രിയുടെ ഈ മൗനം പെണ്‍മക്കളെ സംബംന്ധിച്ച് അപകടകരമാണെന്നും ചന്ദ്രശേഖര്‍ ആസാദ് തുറന്നടിച്ചു.
ഹത്രാസ് കൊലപാതകത്തില്‍ കേന്ദ്ര സര്‍ക്കാരിനെതിരെയും യോഗി ആദിത്യനാഥിനെതിരെയും പ്രതിഷേധം കനക്കുകയാണ്. സംഭവത്തില്‍ മൗനം പാലിച്ചുകൊണ്ട് യുഎന്നില്‍ കേന്ദ്ര വനിത ശിശു വികസന വകുപ്പ് മന്ത്രി സ്മൃതി ഇറാനി നടത്തിയ പ്രസ്താവനയും വിവാദങ്ങള്‍ക്ക് ഇടയാക്കി.
ഏറ്റവും ശക്തമായി സ്ത്രീ ശാക്തീകരണം നടപ്പാക്കുന്ന രാജ്യമാണ് ഇന്ത്യയെന്നായിരുന്നു മന്ത്രിയുടെ അവകാശവാദം. സ്ത്രീകള്‍ക്കെതിരെ വര്‍ദ്ധിച്ചു വരുന്ന ലൈംഗിക അതിക്രമങ്ങള്‍ക്കെതിരെ കേന്ദ്രസര്‍ക്കാര്‍ നടപടി സ്വീകരിക്കാത്തതിനെതിരെ രാജ്യ വ്യാപകമായി പ്രതിഷേധം ഉയരുന്ന സാഹചര്യത്തിലാണ് മന്ത്രിയുടെ ഈ പ്രസ്താവന.
