തിരുവനന്തപുരം: സ്വര്‍ണക്കടത്ത് കേസില്‍ മൂന്ന് പേരെ കൂടി അറസ്റ്റ് ചെയ്തു. റമീസുമായി ബന്ധമുള്ളവരാണ് അറസ്റ്റിലായത്. പിടിയിലായ മൂവാറ്റുപുഴ സ്വദേശി ജലാലും മറ്റ് രണ്ടുപേരും നിരവധി സ്വര്‍ണക്കടത്ത് കേസില്‍ പ്രതികളാണ്. പ്രതി ജലാല്‍ കസ്റ്റംസില്‍ കീഴടങ്ങുകയായിരുന്നു. വിമാനത്താവളങ്ങള്‍ വഴി 60 കോടിയുടെ സ്വര്‍ണം കടത്തിയിട്ടുണ്ട്. വര്‍ഷങ്ങളായി കസ്റ്റംസ് അന്വേഷിക്കുന്ന പ്രതിയാണ് ജലാല്‍. നാടകീയമായാണ് മൂവാറ്റുപുഴ സ്വദേശി ജലാലിന്‍റെ കീഴടങ്ങല്‍.
സ്വര്‍ണക്കടത്ത് കേസില്‍ കഴിഞ്ഞ ദിവസം പിടിയിലായ റമീസ് റിമാന്‍ഡിലാണുള്ളത്. എന്‍.ഐ.എയുടെ എഫ്ഐആര്‍ പ്രകാരം നാല് പ്രതികളാണ് കേസിലുള്ളത്. ഒന്നാം പ്രതി കേസില്‍ അറസ്റ്റിലായ സരിതും, രണ്ടാം പ്രതി സ്വപ്ന സുരേഷും മൂന്നാം പ്രതി ഫൈസല്‍ പരീത്, നാലാംപ്രതി സ്വപ്നയുടെ ബിസിനസ് പങ്കാളിയായ സന്ദീപ് നായരുമാണ്.
സരിത്തിന്റെ മൊഴിയില്‍ നിന്നാണ് റമീസിന്‍റെ പങ്ക് വ്യക്തമായത്. അനധികൃതമായി കടത്തുന്ന സ്വര്‍ണം വാങ്ങി വിതരണക്കാരിലേക്ക് എത്തിക്കുന്നവരില്‍ പ്രധാനിയാണ് റമീസെന്നാണ് സൂചന. കഴിഞ്ഞ വര്‍ഷം നവംബറില്‍ നെടുമ്പാശ്ശേരി വിമാനത്താവളം വഴി തോക്ക് കടത്തിയ കേസിലും പ്രതിയാണ് റമീസ്. റമീസിന്‍റെ പെരിന്തല്‍മണ്ണ വെട്ടത്തൂരിലെ വീട്ടില്‍ കഴിഞ്ഞ ദിവസം കസ്റ്റംസ് റെയ്ഡ് നടത്തിയിരുന്നു.
