കൊച്ചി: സ്വര്‍ണക്കടത്ത് കേസ് പരിഗണിക്കുന്ന എന്‍ഐഎ കോടതി ജഡ്ജിയുള്‍പ്പെടെ പത്ത് ജുഡിഷ്യല്‍ ഓഫിസര്‍മാര്‍ക്ക് സ്ഥലം മാറ്റം. എന്‍ഐഎ കോടതി ജഡ്ജി പി.കൃഷ്ണകുമാറിനെ കൊല്ലം ജില്ലാ ജഡ്ജിയായാണ് നിയമിച്ചിട്ടുള്ളത്. പാലായിലെ മോട്ടോര്‍ ആക്സിഡന്റ് ക്ലെയിം ട്രിബ്യൂണല്‍ ജഡ്ജി കെ. കമനീസിനെയാണ് എന്‍.ഐ.എ കോടതി ജഡ്ജിയായി നിയമിച്ചിട്ടുള്ളത്.
തലശേരി ജില്ലാ ജഡ്ജിയായ ബി. കലാം പാഷയെ പാലക്കാട് ജില്ലാ ജഡ്ജിയായും പത്തനംതിട്ട ജില്ലാ ജഡ്ജി ടി.കെ. രമേഷ്‌കുമാറിനെ കാസര്‍ഗോഡ് കുടുംബക്കോടതി ജഡ്ജിയായും നിയമിച്ചിട്ടുണ്ട്. കോഴിക്കോട് വിജിലന്‍സ് ജഡ്ജി കെ.വി. ജയകുമാറിനെ തലശേരി ജില്ലാ ജഡ്ജിയായും തൃശൂര്‍ മോട്ടോര്‍ ആക്സിഡന്റ് ക്ലെയിംസ് ട്രൈബ്യൂണല്‍ അഡീ. ജില്ലാ ജഡ്ജി കെ. ആര്‍. മധുകുമാറിനെ പത്തനംതിട്ട ജില്ലാ ജഡ്ജിയായും നിയമിച്ചു.
അടുത്തയാഴ്ച മുതല്‍ സ്വര്‍ണക്കടത്തുള്‍പ്പെടെയുള്ള കേസുകള്‍ പുതിയ ജഡ്ജിയാണ് പരിഗണിക്കുക. സ്വര്‍ണക്കടത്ത് കേസില്‍ സ്വപ്നയൊഴികെയുള്ള മുഖ്യ പ്രതികള്‍ എന്‍.ഐ.എ കോടതിയില്‍ ജാമ്യാപേക്ഷ നല്‍കിയിട്ടുണ്ട്.
