കൊച്ചി: സംസ്ഥാനത്ത് സ്വര്‍ണ വിലയില്‍ വീണ്ടും വര്‍ധനവ്. പവന് 480 രൂപയാണ് ഇന്ന് ഒറ്റ ദിവസം കൊണ്ട് വര്‍ധിച്ചിരിക്കുന്നത്. ഇതോടെ ഒരു പവന് സ്വര്‍ണത്തിന് 37,880 രൂപയാണ് ഇന്നത്തെ വിപണി നിരക്ക്. ഗ്രാമിന് 60 രൂപ കൂടി 4,735 രൂപയാണ്. സ്വര്‍ണ വിലയില്‍ എക്കാലത്തെയും റെക്കോര്‍ഡ് നിരക്കാണ് ഇന്ന് രേഖപ്പെടുത്തിയിരിക്കുന്നത്.
ആഗോള വിപണികളില്‍ സ്വര്‍ണ വില എട്ട് വര്‍ഷത്തെ ഏറ്റവും ഉയര്‍ന്ന നിരക്കിലാണ് ഇപ്പോള്‍ എത്തി നില്‍ക്കുന്നത്. അന്താരാഷ്ട്ര വിപണിയിലെ വില വര്‍ധനവാണ് കേരളത്തെയും സ്വാധീനിച്ചിരിക്കുന്നത്. ഈ വര്‍ഷം ജനുവരി ഒന്നിനായിരുന്നു ഏറ്റവും കുറഞ്ഞ നിരക്ക് രേഖപ്പെടുത്തിയിരുന്നത്. കോവിഡ് പ്രതിസന്ധി തുടരുന്നതും രൂപയുടെ മൂല്യം കുറഞ്ഞതുമാണ് വില വര്‍ധനവിന്റെ പ്രധാന കാരണം. എണ്ണ വില ഇടിയുന്നതിനാല്‍ സുരക്ഷിത നിക്ഷേപമെന്ന നിലയില്‍ സ്വര്‍ണ വില ഉയര്‍ന്നു കൊണ്ടിരിക്കുകയാണ്.
