പാലക്കാട്: വനം വകുപ്പ് ഉദ്യോഗസ്ഥര്‍ക്ക് ആനപിണ്ഡം പാഴ്സലായി അയച്ച് ആന പ്രേമി സംഘം. പാലക്കാട് തിരുവിഴാംകുന്നില്‍ ആന ചരിഞ്ഞ കേസിലെ പ്രതികളെ പിടികൂടാത്തതില്‍ പ്രതിഷേധിച്ചാണ് ആന പ്രേമി സംഘം പാഴ്സല് അയച്ചത്.
പാലക്കാട് ഹെഡ് പോസ്റ്റോഫീസിന് മുന്‍ വശത്തിനടുത്തെത്തിയ ആനപ്രേമി സംഘം ആന പിണ്ടം കവറിലാക്കി പാഴ്സല് അയക്കുകയായിരുന്നു. ഭംഗിയായി പാക്ക് ചെയ്ത ‘പാക്ക്’ പോസ്റ്റല്‍ സര്‍വ്വീസ് വഴി മണ്ണാര്‍ക്കാട് ഫോറസ്റ്റ് ഡിവിഷന്‍ ഓഫീസിലേക്കാണ് അയച്ചത്. പാലക്കാട് തിരുവിഴാംകുന്നില്‍ ആന ചെരിഞ്ഞ കേസില്‍ പൊലീസും, വനം വകുപ്പും അന്വേഷണം നടത്തി 8 മാസമായിട്ടും പ്രതികളെ പിടികൂടാന്‍ കഴിഞ്ഞിരുന്നില്ല. ഇതില്‍ പ്രതിഷേധിച്ചാണ് ആനപ്രേമി സംഘം പാര്‍സല്‍ അയച്ചത്.
2020 മെയ് 25നാണ് ഗര്‍ഭിണിയായ കാട്ടാന സ്ഫോടക വസ്തു നിറച്ച ഫലം കഴിച്ചതിനെ തുടര്‍ന്ന് ചരിഞ്ഞത്. സ്ഫോടക വസ്തു നിറച്ച ഫലം കഴിച്ച കാട്ടാനയുടെ മുഖം തകര്‍ന്നിരുന്നു. വായയും നാവും ഗുരുതരമായി പൊള്ളുകയും ചെയ്തിരുന്നു. ഭക്ഷണം കഴിക്കാനാകാതിരുന്ന ആന പട്ടിണികിടന്നാണ് മരിച്ചത്.
